Трамп урушдан кейин Эрон харитаси ўзгариши мумкинлигини айтди

АҚШ Президенти Дональд Трамп АҚШ ва Исроил билан урушдан кейин Эроннинг ҳудудий чегаралари ўзгариши мумкинлигини тахмин қилди. Бу ҳақда у кеча, 7 март куни Air Force One бортида журналистлар билан суҳбатда сўз очди.

Трампдан урушдан кейин Эрон харитаси аввалгидек қоладими, деб сўрашганда, у: “Буни сизга айта олмайман. Эҳтимол, йўқ”, деб жавоб берган.

Бундан ташқари, Трамп Эроннинг янги етакчиси сифатида “эронликларни урушга тортмайдиган” шахс бўлишини афзал кўришини айтган.

“Ҳа. Буни амалга ошириш учун ҳар беш ёки ўн йилда қайтиб келишимиз шарт эмас. Биз уларни [эронликларни] урушга тортмайдиган етакчини танлашни хоҳлаймиз”, деди Президент Америка томони Эроннинг навбатдаги раҳбарини танлашда иштирок этишни хоҳлайдими деган саволга жавобан.

The New York Times нашрининг ёзишича, Олий раҳбарлик лавозимига асосий номзод сифатида Али Хоманаийнинг иккинчи ўғли, 56 ёшли Мужтабо кўрилмоқда.

Трамп Мужтабонинг номзодини “қабул қилиб бўлмас” деб атаган. У АҚШ “беш йилдан кейин” яна урушга кирмаслиги учун ўзидан олдинги раҳбарнинг сиёсатини давом эттирадиган етакчи тайинланишини хоҳламаслигини билдирган.

Эслатиб ўтамиз, аввалроқ Эронда мамлакат Олий раҳбарини сайлаш бўйича якдилликка эришилгани ҳақида хабар берилган эди.