Трамп ва Си Цзиньпин музокараларни бошлади (видео)

АҚШ Президенти Дональд Трамп ва Хитой Халқ Республикаси Раиси Си Цзиньпин Пекинда музокараларни бошлади. Бу ҳақда CNN хабар берди.

Етакчилар Хитой пойтахтидаги Халқ мажлислари буюк саройига қизил гилам тўшалган зинапоялар орқали кўтарилган.

Ундан аввал Си Цзиньпин Трамп учун расмий кутиб олиш маросимини ўтказган. Етакчилар бир-бири билан қўл бериб кўришган.

Хитой раҳбари кириш нутқида АҚШ ва Хитой рақиб эмас, ҳамкор бўлиши кераклигини таъкидлаган.

“Бир-бири учун муваффақиятга эришиш, биргаликда равнақ топиш ва янги даврда йирик давлатлар ўртасидаги муносабатлар учун тўғри йўлни белгилаш керак”, деган у.

Трамп эса Си Цзиньпин билан “ажойиб муносабатлар”га эга эканини айтиб, Хитой ва унинг раҳбарига “улкан ҳурмат” билан қарашини билдирган.

Шунингдек, у Америка делегацияси ўзаро савдо масалаларини муҳокама қилишни интиқлик билан кутаётганини ва ушбу учрашувда қатнашиш улар учун катта шараф эканини қўшимча қилган.

Эслатиб ўтамиз, аввалроқ Дональд Трампнинг Хитойга амалга оширадиган ташрифида Американинг йирик компаниялари раҳбарлари ҳам иштирок этиши ҳақида хабар берилганди. Миллиардерлар Илон Маск, Тим Кук, Ларри Калп ҳамда Келли Ортберг делегация таркибидан ўрин олган.