Трампни Эрон энергетикасига зарба беришдан ким қайтаргани маълум бўлди

Вашингтоннинг иттифоқчилари ва Форс кўрфази мамлакатлари АҚШ Президенти Дональд Трампни Эроннинг энергетика инфратузилмасига зарба беришдан қайтарган. Бу ҳақда ўз манбаларига таяниб, “Bloomberg” хабар берди.

Нашр маълумотларига кўра, иттифоқчилар Трампни агар Вашингтон таҳдиди амалга ошса, уруш ҳалокатга айланишидан огоҳлантирган. АҚШнинг Яқин Шарқдаги шериклари Эрон инфратузилмасига узоқ муддатли зарар етказиш уруш тугаганидан кейин мамлакатнинг муқаррар равишда “муваффақиятсиз давлат” (failed state)га айланишига олиб келишини таъкидлаган.

Шунингдек, “Bloomberg” Трампнинг Эрон энергетика инфратузилмасига зарба беришни кечиктириш қарорини бозорларни “тинчлантириш” истаги билан боғламоқда. Трамп томонидан эълон қилинган бу қарор нефть нархининг зудлик билан пасайишига сабаб бўлди.

Эслатиб ўтамиз, жорий йилнинг 21 март куни Трамп Эрондан Ҳормуз бўғозини икки кун ичида очишни талаб қилган эди. У агар бу содир бўлмаса, АҚШ зарба бериши ва Эрон электр станцияларини йўқ қилишини айтганди. 23 март куни АҚШ Президенти Вашингтон ва Теҳрон “жуда яхши ва самарали музокаралар ўтказганини”, шу сабабли Пентагонга Эрон электр станциялари ва энергия инфратузилмасига зарба беришни беш кунга қолдиришни буюрганини маълум қилди. Эрон эса АҚШ билан музокаралар ўтказилганини инкор этмоқда.

Трампнинг сўзларига кўра, Эрон билан музокараларда Америка томонидан унинг куёви Жаред Кушнер ва махсус вакили Стив Уиткофф иштирок этган. Трамп Эрон томонидан ким қатнашганига аниқлик киритмаган, фақатгина бу “юқори мартабали ва ҳурматли етакчи” эканини қайд этди. “The Jerusalem Post” нашри Вашингтон билан музокараларни Эрон парламенти спикери Муҳаммадбоғир Ғолибаф олиб бораётганини ёзган эди. Бироқ у буни рад этмоқда.