Туркияда 212 нафар футбол амалдори ноқонуний пул тиккани учун қўлга олинди

Туркия футбол федерацияси (ТФФ) сўнгги беш йил давомида футбол ўйинларига ноқонуний тарзда пул тикиб келган 212 нафар профессионал клуб амалдорини аниқлади. Бу ҳақда “TRT Haber” нашри хабар берди.

Маълумотларга кўра, ТФФ интизомий кенгаши 108 нафар мураббий ва 104 нафар клуб менежерини футбол ўйинларига ноқонуний пул тикиш фаолиятини аниқлаган.
Аввалроқ, 2025 йил ноябрь ойида, ТФФ футбол учрашувларига пул тиккани сабабли 149 нафар ҳакамни турли муддатларга четлатганди. Интизомий кенгаш қарорига кўра, ҳакамлар 8 ойдан 12 ойгача дисквалификация қилинган.

Ўша пайтда ТФФ президенти Иброҳим Ҳожиусмон ўғли ҳукумат маълумотларига таянган ҳолда олиб борилган тергов натижалари мамлакат профессионал лигаларида фаолият юритаётган 571 нафар ҳакамдан 371 нафари букмекерлик аккаунтларига эга эканини, шулардан 152 нафари мунтазам равишда пул тикиб келганини маълум қилган эди.

Маълумотларга кўра, ноқонуний пул тикиш бўйича олиб борилаётган тергов доирасида мингдан ортиқ футболчи ТФФ интизомий кенгаши олдида жавоб бериши мумкин.
Шунингдек, Истанбул бош прокурори Акин Гюрлек маҳаллий ҳокимият томонидан Интерпол ва UEFA билан ҳамкорликда олиб борилаётган тергов доирасида бир қатор турк футбол клублари раҳбариятини ҳибсга олиш эҳтимоли борлигини маълум қилди.

Эслатиб ўтамиз, аввалроқ Истанбул прокуратураси ушбу фаолият билан боғлиқ тергов доирасида 29 кишини, жумладан 14 нафар футболчини ҳибсга олиш учун ордер берган эди.