Туркияда ўзбекистонлик аёлнинг ўлдирилиши ортидан норозилик акцияси ўтказилди (видео)

Аввалроқ, Туркиянинг Истанбул шаҳрида ўзбекистонлик аёл бошқа 2 нафар ўзбекистонлик эркак томонидан шафқатсизларча ўлдирилгани ва чиқинди контейнерига ташлаб кетилгани ҳақида хабар берилган эди. Мазкур воқеа ортидан бугун, 26 январь куни аёллар Туркиянинг Анқара ва Истанбул шаҳрида қотиллик ва жазосизлик сиёсатига қарши норозилик акцияси ўтказди.

“Бу воқеа жазосизлик сиёсатининг, аёллар қотиллигига кўз юмилишининг ва адлия тизими ишламаётганининг оқибатидир. Жиноятчилар жазоланмаслигига шунчалик ишонишадики, шаҳарнинг қоқ марказида, ҳаммага кўриниб турган чиқинди контейнерига ўлдирилган аёлнинг жасадини ташлай олишяпти. Ҳали ҳатто исмини ҳам тўлиқ билмаган аёл дўстимизнинг ҳаққини талаб қиламиз, жиноятчилар муносиб жазони олишини таъминлаймиз ва жараённи кузатиб борамиз. Аёллар жасадлари контейнерлардан топилаётган бу тузумни ўзгартирамиз, аёллар қотиллигини тўхтатамиз”, дейилади “Аёллар қотиллигини тўхтатамиз” платформаси баёнотида.

Норозилик акцияси Истанбулда маҳаллий вақт билан соат 16:00 да Османбей метро бекати яқинида, Анқарада эса Юксел кўчаси Инсон ҳуқуқлари ҳайкали олдида бошланган. Аёллар жасад топилган Куюлубоғ кўчасига юриш қилиб, эркаклар зўравонлигига қарши “Муҳожир аёллар ёлғиз эмас” дея шиорлар айтган.

Шиорлар остида юриш қилган аёллар “Эркак зўравонлигига барҳам бер”, “Хавфсиз ва эркин ҳаёт истаймиз”, “Аёллар қотиллиги — сиёсий масала”, “Шишлида бир йилда 3 аёл қотиллиги”, “Муҳожир аёллар ёлғиз эмас” ва “Ўлдирилган аёлларнинг ҳисобини сўраймиз” деган ёзувли плакатларни кўтарган.

“Кеча Истанбулнинг қоқ маркази – Шишлида аёл дўстимизнинг жонсиз танаси чиқинди контейнеридан топилди. Унинг танаси бўлакларга бўлинган эди. Ўлдирилган аёл 36 ёшли Ўзбекистон фуқароси Дурдона Ҳакимова эканини билдик. Жиноятчилар кеча чет элга қочишга уринаётган пайтда аэропортда қўлга олинди.

Дурдонанинг ўлимига ҳокимият масъул. Агар аёлларнинг ҳатто Истанбул марказида ҳам яшаш ҳуқуқи тортиб олинаётган бўлса, бу шу ҳокимиятнинг натижасидир. Жиноятчи кўрсатмасида Дурдона билан ўша куни танишганини, муносабатлари бўлганини, жанжаллашиб қолиб, кейин ўлдирганини айтмоқда. Буни айтиш қанчалик осон, шундай эмасми? Аммо бир аёл ўлдирилди. Бу кўрсатма бошидан охиригача жазони енгиллаштиришга қаратилган. Дурдона муҳожир эди. Балки ишлаш учун келгандир, орзулари бор эди, янги ҳаёт қурмоқчи эди. Бу орзулар унинг қўлидан тортиб олинди. 2025 йилда 294 аёл ўлдирилди. Уларнинг барчаси бугун орамизда бўлиши мумкин эди”, дея баёнот берган маҳаллий аёллар акция давомида.

Ҳибсдаги шаҳар ҳокимидан баёнот

2025 йил 23 мартдан бери қамоқда бўлган Шишли тумани ҳокими Расул Эмраҳ Шаҳан Силиври қамоқхонасидан ушбу қотилликка муносабат билдирган. У аёллар қотиллиги жазосизлик ва бепарволик сабаб “қирғин”га айланаётганини қайд этган.

“Кеча Шишлида 36 ёшли Ўзбекистон фуқароси Дурдона Ҳакимованинг ваҳшийларча ўлдирилгани ҳақидаги хабар бугун Силиврида менга етиб келди. Аёллар қотиллиги жазосизлик, бепарволик ва сукут туфайли тобора кучайиб бораётган қирғинга айланмоқда. Бу муаммони маҳалладан бошлаб ҳуқуқ-тартибот, ижтимоий хизматлар, муниципалитет ва марказий идоралар ҳамкорликда ҳал қилиши керак. Деворга қараб ўйлайман: аёлларни, қиз болаларни, Дурдоналарни, Ширинларни қандай ҳимоя қиламиз? Бу жиноятнинг очилиши ва айбдорларнинг энг оғир жазога тортилиши ортидан бораман. Шишли, Истанбул ва бутун мамлакат кўчалари аёллар учун хавфсиз бўлмагунча, бизга тинч уйқу йўқ”, деган у.

Ваҳший қотиллик

жорий йилнинг 24 январь куни кечаси Истанбулнинг Шишли тумани Дуатепе маҳалласида даҳшатли воқеа содир бўлди. Маҳаллий вақт билан соат тахминан 19:40 ларда ҳудудда чиқинди йиғиш ва қоғоз териш билан шуғулланиб юрадиган Окан исмли шахс Куюлубоғ кўчаси, 25-уй олдидаги ахлат контейнерини ковлар экан, чойшаб ва пакетларга ўралган жасадни пайқаб қолган. У ҳолат ҳақида хабар бериш учун полиция бўлимига бориб, кўрганларини айтиб берган.

Оканнинг айтишича, у ҳодиса вақтида контейнерни кавлаётганида қора пакетни кўрган, пакетни йиртганида қон ва инсон жасадига кўзи тушган ҳамда жасад ҳали иссиқ эканини сезган. Шундан сўнг Ферикўй полиция бўлимига бориб ҳолатни маълум қилган, полиция ходимлари ҳам воқеа жойига келиб, жасадни контейнер ичида кўрган. У полиция билан бирга яна ҳодиса жойига қайтган. Дастлабки кўздан кечиришда жасаднинг боши кесилган бўлиб, аёл кишига тегишли экани тахмин қилинган.

Қотиллик бўлими детективлари олиб борган текширувлар давомида яна бир гувоҳнинг кўрсатмаси олинган. Гувоҳнинг айтишича, соат 19:00 лар атрофида у онасини кўриш учун мазкур кўчага келган ва шу пайтда ахлат контейнери олдида соқолли икки эркакнинг чамадон билан кутиб турганини кўрган.

Шунингдек, гумонланувчиларнинг жасадни чамадон ичида олиб келиб ташлаган лаҳзалари акс этган кузатув камераси тасвирлари ҳам аниқланган. Кадрларида икки шахс қўлларида чамадон билан контейнер ёнига келаётгани кўринади.

Детективлар ҳодиса жойида олиб борган ишлар чоғида жасаднинг танаси солинган контейнерда бош ва оёқлар йўқлигини аниқлаган. Жасад солинган деб тахмин қилинган чамадон эса бир неча кўча наридаги Бозкурт кўчасидаги бошқа ахлат жойидан топилган.

Ҳодиса жойи бузилмаслиги учун жасад контейнердан чиқарилмаган, шу сабабли тананинг тўлиқ ҳолати жойида батафсил баҳоланмаган. Ҳудуд хавфсизлик ҳалқасига олиниб, Қотиллик бўлими ва Ҳодиса жойини кўздан кечириш бўлимига хабар берилган ва кенг қамровли тергов бошланган.

Жамоат хавфсизлиги бўлими ходимлари томонидан ўтказилган текширувлар натижасида бармоқ изи орқали аёлнинг шахси аниқланган. У Ўзбекистон фуқароси Дурдона Ҳакимова экани маълум бўлган. Жасад кўздан кечирилганда унинг устида қора рангли куртка, қора рангли узун енгли свитшот, қора ички кийим бўлгани ва оқ чойшабга ўралган ҳолатда экани аниқланган. Марҳуманинг шахси бармоқ изи орқали тасдиқланган.

Камера ёзувлари ва гувоҳларнинг кўрсатмаларига кўра, ҳодиса жойидаги ахлат контейнерига қорамтир кийимдаги, соқолли икки эркак оч рангли чамадон билан келгани, кейин яна чамадон билан пиёда кўчадан чиқиб кетгани, гумонланувчилар чамадонни ҳодиса жойига яқин бўлган Бозкурт кўчаси томон ташлаб кетгани аниқланган.

Истанбул полицияси Истанбул аэропортида Грузияга қочмоқчи бўлган пайтда икки нафар қотилликда гумонланувчини қўлга олган. Уларнинг иккаласи ҳам Ўзбекистон фуқаролари экани маълум бўлган. Разведка бўлими ва Қотиллик бўлими томонидан бир неча соат ичида ушланган гумонланувчилардан бири қотилликни бевосита содир этган, иккинчиси эса ёрдам бергани аниқланган.

Қотилликни содир этган Д.Т. кўрсатма берган.

“Дурдона Ҳакимова билан воқеа куни танишганмиз, орамизда муносабат бошланган. Жанжаллашиб қолдик ва мен уни пичоқ билан ўлдирдим. Кейин дўстим билан бирга жасадни бўлакларга ажратдик. Жасад қисмларини алоҳида пакетлаб, чамадон ичига жойладик. Сўнг тижорат таксиси билан Шишли туманига келдик ва жасад ҳамда унинг қисмларини турли ахлат контейнерларига ташлаб юбордик”, дейди у.

Гумонланувчиларнинг аэропортдан қочишга уринган пайтда қўлга олинган лаҳзалари ҳам тасвирларга тушган. Шунингдек, гумонланувчилар фойдаланган таксини бошқарган шахс ҳам қўлга олинган. Шу тариқа иш бўйича ҳибсга олинганлар сони 3 нафарга етган.