Украина Ташқи ишлар вазири FIFA президентини ҳақорат қилди

Украина FIFA президенти Жанни Инфантинонинг Россия клубларига қўйилган чекловларни бекор қилиш ва уларни халқаро футболга қайтариш ҳақидаги таклифига кескин муносабат билдирди. Бу ҳақда UNIAN нашри хабар берди.

Нашр маълумотларига кўра, Инфантино Россия жамоаларининг мусобақаларга қайтишини қўллаб-қувватлаган. Унинг фикрича, россиялик футболчиларга нисбатан қўлланилган санкциялар “янада кўпроқ умидсизлик ва нафратни келтириб чиқарган”.

Бироқ, Украина томони бу фикрга қатъиян қарши чиқди. Хусусан, Украина Ташқи ишлар вазири Андрей Сибига FIFA президентининг баёнотига ижтимоий тармоқларда кескин муносабат билдирди.

“679 нафар украиналик қиз ва ўғил бола энди ҳеч қачон футбол ўйнай олмайди – Россия уларни ўлдирди. Ва у буни давом эттирмоқда. Шундай бир пайтда ахлоқий таназзулга юз тутганлар тақиқларни бекор қилишни таклиф қилмоқда. Ҳолбуки, Россия урушни тўхтатгани йўқ”,  дейди Сибига.

Шунингдек, Украина футбол ассоциацияси (UAF) ҳам расмий баёнот билан чиқиб, FIFA ва Жанни Инфантинони уруш давом этаётган бир вақтда Россия жамоаларини халқаро мусобақалардан четлатиш бўйича мавжуд позицияни ўзгартирмасликка чақирди.

UAF баёнотида таъкидланишича, Украина ҳудудида ҳарбий ҳаракатлар давом этмоқда, вазият яхшиланмаган, ҳужумлар тинч аҳоли ва фуқаролик инфратузилмасига жиддий зарар етказмоқда. Шунингдек, Россия қўшинлари тўқнашув чизиғи бўйлаб олдинга силжишда давом этаётгани қайд этилган.

“Биз тажовузкорни мусобақалардан четлаштириш самарасиз деган даъвога қўшилмаймиз. Аксинча, бу босим ўтказишнинг самарали усули. Ҳар қандай Россия терма жамоаларининг қайта интеграцияси мусобақаларнинг хавфсизлиги ва яхлитлигига таҳдид солади”,  дейилади UAF баёнотида.

Эслатиб ўтамиз, аввалроқ FIFA президенти Жанни Инфантино Россия жамоаларига қўйилган тақиқни олиб ташлаш масаласини кўриб чиқишга мажбур эканини ва бу тақиқнинг фойдасизлигини айтган эди.