Уруш деярли тугади – Трамп

АҚШ Президенти Дональд Трамп Эронга қарши уруш режалаштирилган муддатдан тезроқ кечаётгани ва деярли якунланиш арафасида эканини билдирди. Бу ҳақда у CBS телеканалига берган интервьюсида сўз очди.

АҚШ Президентининг сўзларига кўра, ҳарбий ҳаракатлар режалаштирилган графикдан анча олдинга ўтиб кетган. Аввалроқ, Оқ уйда бу уруш бир ойдан ортиқ давом этиши мумкинлиги тахмин қилинган эди.

Трампнинг таъкидлашича, Эроннинг на флоти, на алоқаси, на ҳарбий-ҳаво кучлари қолган, ракеталар эса жуда кам миқдорда қолган.

Кейинроқ Трамп Флорида штатида Республикачилар партияси тадбирида чиқиш қилиб, Эронга қарши урушда ғалаба яқин эканини яна бир бор таъкидлади. Унинг айтишича, уруш “жуда тез орада тугайди”.

АҚШ Президенти бу ҳаракатни “қисқа муддатли операция” деб атаб, уни ёвузликдан халос бўлиш учун амалга оширилганини билдирган.

Шу билан бирга, Ислом инқилоби қўриқчилари корпуси Эрон армияси урушни кенгайтиришга тайёр эканини ва унинг қачон тугашини Эроннинг ўзи белгилашини маълум қилган. Эрон ҳарбийлари, шунингдек Исроил ва АҚШ Эронни бомбардимон қилишда давом этар экан, минтақадан бир литр ҳам нефть экспорт қилинишига йўл қўйилмаслигини таъкидлаган.

Эслатиб ўтамиз, аввалроқ Дональд Трамп Эронга қарши ҳарбий операцияни қачон тугатиш ҳақидаги қарор АҚШ ва Исроил томонидан биргаликда қабул қилинишини маълум қилганди. АҚШ Президентининг айтишича, бу қарор Исроил Бош вазири Биньямин Нетаньяху билан келишилган ҳолда қабул қилинади.