Ўзбекистон футболи жадал ривожланмоқда – МЮ собиқ футболчиси

“Манчестер Юнайтед” ва “Манчестер Сити” клубларининг собиқ футболчиси, ҳозирда Брянскнинг “Динамо” клуби бош мураббийи бўлиб ишлаётган Андрей Канчельскис Ўзбекистонда футбол ривожланаётганини ва Россия ҳамда Европа жамоалари ўзбекистонлик футболчиларга эътибор қаратиши кераклигини таъкидлади.

“Ўзбекистонда футбол жадал ривожланмоқда. Уларнинг терма жамоаси Жаҳон чемпионатига тасодифан чиқмади. Бизнинг клублар Осиёдан келган футболчиларга эътибор қаратиши керак. Бу жуда кўп иқтидорларга эга яқин ва дўстона минтақа”, дейди Канчельскис “Euro-football”га берган интервьюсида.

Маълумот учун, Ўзбекистон  миллий терма жамоаси 2026 йилги Жаҳон чемпионати қуръасида Португалия ва Колумбия билан бирга “К” гуруҳдан жой олди. Ушбу гуруҳдаги яна бир иштирокчи плей-офф ғолиби (ДР Конго, Ямайка ёки Янги Каледония) бўлади.

Эслатиб ўтамиз, аввалроқ россиялик телебошловчи ва спорт шарҳловчиси Денис Казанский Жаҳон чемпионати қуръа ташлаш маросимидан сўнг Ўзбекистон миллий терма жамоаси Португалияга қарши муносиб қаршилик кўрсата олиши мумкинлигини таъкидлаган эди.