Ватикан “Тинчлик кенгаши”га қўшилишдан бош тортди

Ватикан АҚШ Президенти Дональд Трамп ташаббуси билан тузилган Ғазо сектори бўйича “Тинчлик кенгаши”га қўшилмайди. Бу ҳақда бугун, 18 февраль куни давлат котиби, кардинал Пьетро Паролин “Corriere della Sera” газетасига маълум қилди.

“Йўқ, Ватикан Ғазо бўйича “Тинчлик кенгаши”да иштирок этмайди, чунки унинг ўзига хос мақоми бор ва у бошқа давлатлар табиатига мос келмайди. Бироқ Италия кузатувчи сифатида қатнашишини инобатга оламиз”, дейди Паролин.

Кардиналнинг эслатишича, ўтган ой Муқаддас тахт Кенгашга қўшилиш таклифини олган. Унинг сўзларига кўра, Ватикан Италия ҳукуматининг ушбу тузилма ишида қатнашиш қарорини “қайд этади”, бироқ “ҳал этилиши лозим бўлган айрим муаммоли жиҳатлар”ни кўрмоқда. Хусусан, у халқаро миқёсда инқирозли вазиятлар анъанавий равишда Бирлашган Миллатлар Ташкилоти орқали мувофиқлаштирилишини таъкидлаган ва Муқаддас тахт айнан шу тамойилни қўллаб-қувватлашини билдирган.

Эслатиб ўтамиз, “Тинчлик кенгаши”ни тузиш Дональд Трамп томонидан таклиф этилган Ғазо секторидаги можарони тартибга солиш режаси доирасида амалга оширилган. Тузилма ташкил этилгани ҳақида 2026 йил январь ойида эълон қилинган. Унга қўшилиш таклифлари дунёнинг қарийб 60 нафар етакчисига юборилган, айримлари эса асосчи давлатлар сифатида таклиф этилган. “Кенгаш”нинг илк раиси Трамп, таъсис маросими эса 22 январь куни Давос шаҳрида ўтказилганди.