Вазир гуруч ҳақидаги гапи ортидан истеъфога чиқди

Япония қишлоқ хўжалиги вазири Таку Это бугун, 21 май куни истеъфога чиқди. Бу ҳақда “Kyodo News” хабар берди.

Маълум қилинишича, у бу қарорга гуруч ҳақидаги ножўя баёноти ортидан юзага келган жамоатчилик норозилиги сабабли келган.

Таку Это Либерал-демократик партия учун ташкил этилган хайрия тадбирида одамларга гуруч сотиб олмасликни иддао қилгандек бўлган.

“Мен гуруч сотиб олмайман. Уни менга кўплаб тарафдорларим совға қилишади. Ҳатто уни сотиб юборишим ҳам мумкин эди”, деган вазир.

Ушбу сўзлар айниқса, гуруч нархи икки баравар ошган вақтда айтилгани боис, жамоатчилик норозилигини келтириб чиқарган. Вазир сўзларини изоҳлаб, бу орқали кулги уйғотмоқчи бўлгани ва одамларни соғломроқ навлар сотиб олишга чақирмоқчи бўлганини айтган.

Шунингдек, у хотини ҳам бу гаплар учун уни танқид қилганини маълум қилган.

Ўз вазифасини топшириш жараёнида журналистларга берган интервьюсида Это бўшаш қарорига ўзи келганини билдирган.

“Гуруч нархлари ошган айни оғир пайтда вазирликни бошқаришда давом этишим ўринлими ёки йўқми, деб ўзимдан сўрадим ва давом этмасликка қарор қилдим”, деган у.

Маълумот учун, 2025 йилнинг май ойига кўра, Японияда 5 килограмм гуручнинг ўртача чакана нархи 4,233 иенни ташкил этмоқда, бу ўртача 29 АҚШ долларига тенг. Бу нарх бир йил олдинги нархдан икки баравар кўп.

Нархларнинг ошишига бир қатор омиллар сабаб бўлди, жумладан 2023 йилги рекорд иссиқлик тўлқини ва қурғоқчилик оқибатида ҳосилнинг камайиши, истеъмолчиларнинг гуручни ғамлашга бўлган интилиши ва экспортнинг ошиши. Бундан ташқари, ҳукуматнинг фавқулодда гуруч захираларини бозорга чиқариш ҳаракатлари ҳам нархларни барқарорлаштиришга ёрдам бермади.

Эслатиб ўтамиз, жорий йилнинг ёз ойларида Япония пойтахти Токио шаҳри аҳолисига сув учун олинадиган асосий коммунал тўловлар бекор қилиниши ҳақида хабар берилганди.