AQSH uchun Eron bilan urush xarajati 100 mlrd dollarga yetdi

Urushning 94-kuniga kelib Eron bilan nizoning AQSH uchun qiymati 100 milliard dollarga yetdi. Bu haqda “Iran War Cost Tracker” portali ma’lumotlarida keltirilgan.

Iroqning “Al-Motala” axborot-tahliliy portaliga ko‘ra, AQSH va Isroilning Yaqin Sharqda keskinlikni kuchaytirish strategiyasi o‘z maqsadlariga erishmadi, Eron esa mintaqadagi avvalgi harbiy harakatlar qoidalarini o‘zgartirishga tayyorligini namoyish etmoqda. 

“Butun mintaqa bo‘ylab siyosiy va harbiy aloqalar faollashgan bir sharoitda Yaqin Sharq jarlik yoqasida turibdi. Vaziyatni yumshatish urinishlari yangi keng ko‘lamli portlash ehtimoli bilan chambarchas bog‘lanib ketgan. Bu voqealar bir tomondan Eron, ikkinchi tomondan AQSH va Isroil o‘rtasida davom etayotgan proksi urush fonida yuz bermoqda, bunda Livan qarama-qarshilikning eng zaif va kritik nuqtalaridan biriga aylandi”, deyiladi xabarda.

Urushning 94-kuniga kelib, Eron bilan nizoning AQSH uchun qiymati 100 milliard dollarga yetdi. AQSH Davlat departamenti rahbari Marko Rubio Eron bilan kelishuv bugun, ertaga yoki keyingi haftada amalga oshishi mumkinligini aytdi. O‘z navbatida, CBS telekanali Eronning yuqori martabali harbiy mulozimiga tayanib, AQSH bilan urushning qayta boshlanishi “muqarrar” bo‘lib ko‘rinayotganini qayd etmoqda

“Reuters”ning xabar berishicha, Amerika neftining Osiyoga eksporti misli ko‘rilmagan darajada o‘sganiga qaramay, Eron tomonidan Hormuz bo‘g‘ozi yopib qo‘yilgan taqdirda yuzaga keladigan xomashyo taqchilligini qoplay olmaydi.

Ekspertlarning fikricha, so‘nggi paytlarda Osiyo bozoriga Qo‘shma Shtatlardan rekord hajmdagi neft kirib kelayotgan bo‘lsa-da, ushbu strategik muhim transport arteriyasi bloklangan taqdirda jahon balansidan chiqib ketadigan energiya resurslari hajmining o‘rnini bu oqim jismonan bosa olmaydi.

Hormuz bo‘g‘ozi jahon energiya ta’minoti uchun asosiy tugun bo‘lib qolmoqda va ushbu mintaqadan yetkazib berishning ehtimoliy to‘xtashi natijasida yuzaga keladigan “bo‘shliqni” boshqa manbalar, jumladan, AQSH resurslari hisobiga to‘ldirib bo‘lmaydi. 

Eslatib o‘tamiz, avvalroq Yaqin Sharqdagi mojaro fonida dunyo bo‘ylab aviachiptalar narxi odatdagi yozgi qimmatlashuvdan tashqari yana 10–15 foizga oshgani haqida xabar berilgan edi.