Eron bilan keskinlik: Iordaniya harbiy bazasida o‘nlab AQSH samolyotlari ko‘rindi

Eron bilan keskinlik kuchayib borayotgan bir paytda, Iordaniyadagi AQSH harbiy samolyotlari soni keskin oshdi. Bu haqda sun’iy yo‘ldosh tasvirlari va parvoz ma’lumotlariga tayanib, “The New York Times” xabar berdi.

Ma’lumotlarga ko‘ra, AQSH aviatsiya guruhining joylashtirilishi Muvaffaq Salti harbiy bazasida qayd etilgan.

“Iordaniya markazidagi baza AQSH harbiylari tomonidan Eronga ehtimoliy zarbalarni rejalashtirishning asosiy markaziga aylandi”, deyiladi nashr xabarida.

Sun’iy yo‘ldosh tasvirlarida 60 dan ortiq samolyotni ko‘rish mumkin. Bu ko‘rsatkich ushbu ob’ektdagi odatiy mavjudlikdan deyarli uch baravar ko‘p.

Bundan tashqari, parvozlarni kuzatish ma’lumotlari tahlili shuni ko‘rsatadiki, 15 fevraldan beri bazaga kamida 68 ta transport samolyoti qo‘ngan.

Maqolada qo‘shimcha qiruvchi samolyotlarning ba’zilari boshpanalarda yashiringan bo‘lishi mumkin deb taxmin qilinmoqda. Suratlarda, shuningdek, zamonaviy F-35 qiruvchi samolyotlari, bir nechta uchuvchisiz uchish apparatlari, vertolyotlar va yangi havo mudofaasi tizimlari ko‘rsatilgan.

Iordaniya rasmiylari esa uskunalarni joylashtirish Vashington bilan ikki tomonlama mudofaa kelishuvi doirasida amalga oshirilayotganini bildirgan. 

Eslatib o‘tamiz, avvalroq Vashington Yaqin Sharqda havo nazoratini kuchaytirayotgani aytilgan edi.