Farmatsevtika korxonalari yer, foyda va mol-mulk soliqlaridan ozod qilinadi

O‘zbekistonda joriy yil 1 apreldan boshlab farmatsevtika korxonalari yer, tadbirkorlar foyda va mol-mulk soliqlaridan ozod qilinadi. Bu haqda bugun, 5 mart kuni Prezident Shavkat Mirziyoyev raisligida o‘tkazilayotgan farmatsevtika sohasini rivojlantirish bo‘yicha ustuvor vazifalarga bag‘ishlangan videoselektor yig‘ilishida ma’lum qilindi.

Qayd etilishicha, tadbirkorlar barcha hududlarda ham farmzonalar yo‘qligi sababli, ularga berilgan soliq imtiyozini boshqa korxonalarga ham qo‘llashni so‘ragan. Prezident buni qo‘llab-quvvatlagan va farmatsevtika korxonalari uchun yangi imkoniyatlarni e’lon qilgan.

Joriy yil 1 apreldan boshlab qayerda joylashganidan qat’i nazar, yangi farmatsevtika vositalari ishlab chiqarish, dorivor o‘simlik yetishtirish va qayta ishlash yo‘nalishidagi loyihalar boshlanganidan e’tiboran uch yil muddatga yer solig‘idan ozod qilinadi. Tadbirkorlar loyiha ishga tushgandan boshlab uch yil davomida foyda va mol-mulk soliqlarini to‘lamaydi.

Shu bilan birga, biologik faol qo‘shimcha va kosmetika vositalari ishlab chiqaruvchilari ham xomashyo, uskuna, ehtiyot va butlovchi qismlar importi bojidan ozod qilinadi, farmatsevtika korxonalariga o‘z liniyasida biologik faol qo‘shimcha ishlab chiqarishga ruxsat beriladi.

Bundan buyon har yili 1 iyulgacha mahalliylashtirish tavsiya etiladigan dori vositalari va tibbiy buyumlar ro‘yxati tadbirkorlarga e’lon qilib boriladi.

Ro‘yxatdagi dorilarni ishlab chiqarish bo‘yicha loyiha qilmoqchi bo‘lgan tadbirkorlarga xorijiy valyutada 7 foizli kreditlar beriladi.

Shuningdek, mavjud mahsulotlari bo‘yicha mahalliylashtirishni chuqurlashtirmoqchi bo‘lgan tadbirkorlarga Sanoat kooperatsiyasi jamg‘armasidan 10 yilgacha xorijiy valyutada 6 foizli, milliy valyutada 12 foizli kredit ajratiladi.

Eslatib o‘tamiz, avvalroq O‘zbekistonda dori vositalari va tibbiy buyumlar bozori 2,5 milliard dollarga yaqinlashgani haqida xabar berilgan edi.