Frontdagi vaziyat yomonlashdi, Rossiya armiyasi taktik muvaffaqiyatlarga erishmoqda – Sirskiy
Olam
−
29 aprel 14722
Rossiya armiyasi Ukrainadagi butun front chizig‘i bo‘ylab faol hujum qilmoqda va ayrim yo‘nalishlarda taktik muvaffaqiyatlarga erishmoqda. Bu haqda Ukraina Qurolli kuchlari bosh qo‘mondoni Aleksandr Sirskiy ma’lum qildi.
Uning so‘zlariga ko‘ra, o‘tgan hafta davomida frontdagi vaziyat yomonlashgan. Rossiya qo‘shinlari kuch va vositalarda sezilarli ustunlikni yaratib, bir qator yo‘nalishlarda o‘z kuchlarini jamlagan.
“Vaziyatda dinamik o‘zgarishlar kuzatilmoqda, individual pozitsiyalar kun davomida bir necha marta qo‘l almashadi”, deb yozgan harbiy xizmatchi o‘zining Telegram-kanalida.
Uning aytishicha, Kupyansk yo‘nalishida Rossiya qo‘shinlari Stelmaxovka va Berestovo qishloqlarida to‘planib, u yerda qisman muvaffaqiyatga erishgan, biroq Ukraina Qurolli kuchlari bo‘linmalari tomonidan to‘xtatilgan. Liman yo‘nalishida Rossiya armiyasi Terni qishlog‘i hududida, Severskiy yo‘nalishida – Belogorovka va Razdolevka hududlarida hujum qilmoqda, ammo hamma joyda muvaffaqiyatga erishmadi.
“Kramatorsk yo‘nalishida eng issiq nuqtalar Ivanovskoye va Chasov Yar bo‘lib qolmoqda”, deydi Ukraina Qurolli kuchlari bosh qo‘mondoni.
Sirskiyning fikriga ko‘ra, eng qiyin vaziyat Pokrovskiy va Kuraxovskiy yo‘nalishlarida rivojlangan.
"Dushman ushbu yo‘nalishlarda to‘rttagacha brigadani joylashtirdi va Avdeyevka va Maryinkaning g‘arbiy tomonida Pokrovsk va Kuraxovga yo‘l olib, hujumni rivojlantirishga harakat qilmoqda. Ukraina mudofaa kuchlari bo‘linmalari himoyachilarimizning hayoti va sog‘lig‘ini saqlab, Berdichi, Semenovka va Novomikhailovka g‘arbidagi yangi liniyalarga o‘tdi. Umuman olganda, bu yo‘nalishlarda dushman ma’lum taktik muvaffaqiyatlarga erishdi, biroq operativ ustunlikka erisha olmadi”, deydi bosh qo‘mondon.
Sirskiy Ukraina shimolida hujumkor harakatlarga zudlik bilan tayyorgarlik ko‘rish alomatlari yo‘qligi, biroq Xarkov yo‘nalishida Rossiya qo‘shinlari yig‘ilayotganini bildirdi.
Live
Barchasi
