Kosmik data-markaz: Mask AI1 SI sun’iy yo‘ldoshi tafsilotlarini ochiqladi

Amerikalik tadbirkor Ilon Mask global orbital data-markaz uchun kosmik apparatning ilk versiyasiga aylanuvchi AI1 sun’iy yo‘ldoshining texnik tafsilotlarini oshkor qildi. Bu haqda kompaniya taqdimotiga tayanib, “Bloomberg” xabar berdi.

Qayd etilishicha, SpaceX kompaniyasi orbitada sun’iy intellekt manfaatlari yo‘lidagi hisoblashlar uchun mo‘ljallangan 1 million dona ixtisoslashtirilgan sun’iy yo‘ldoshlar tarmog‘ini joylashtirishni rejalashtirmoqda. AI1 apparatlari Nvidia chiplari va uzunligi 70 metrga yetadigan ulkan quyosh panellari bilan jihozlanadi. Foydali yukning o‘rtacha hisoblash quvvati 120 kVtni tashkil etadi, pik quvvati esa 150 kVtga yetadi.

Yangi apparatlarni ishlab chiqarish uchun kompaniya Texasdagi ishlab chiqarish quvvatlarini kengaytirmoqda. Quyosh panellarini ishlab chiqaruvchi yangi Gigasat zavodi 400 gektar yer maydonida 1 million kvadrat metrdan ortiq joyni egallaydi.

Bundan ham keng ko‘lamli bo‘lgan Terafab korxonasi esa 9 million 300 ming kvadrat metr maydonda qad rostlaydi, bu Tesla’ning Ostindagi gigafabrikasi o‘lchamidan taxminan 10 baravar kattadir. Loyiha uchun yer maydonlari Vayomingdagi affillangan tuzilma tomonidan sotib olinmoqda.

Orbital data-markazlarning yaratilishi SpaceX kompaniyasining birjaga chiqish (IPO) rejalarini tezlashtirmoqda. Bo‘lajak IPO jahon tarixidagi eng yirigi bo‘lishi kutilmoqda. Korporatsiya sun’iy intellekt ishlanmalari bilan shug‘ullanuvchi Anthropic va Google kompaniyalari bilan bo‘lajak kosmik serverlarning hisoblash quvvatlaridan foydalanish huquqini sotish bo‘yicha dastlabki shartnomalarni imzolagan.

Kosmik infratuzilma hamda ma’lumotlarni qayta ishlashning yuqori texnologiyali sektorlari rivojlanishi butun global xizmat ko‘rsatish sohasi va raqamli iqtisodiyot uchun kuchli katalizator bo‘lib xizmat qiladi. Bu IT-bozorini diversifikatsiya qilish imkonini beradi, yerdagi serverlarning mintaqaviy energetik inqirozlarga qaramligini kamaytiradi va o‘rta muddatli istiqbolda yuqori texnologiyali investitsiyalarni global miqyosda qayta taqsimlash uchun zamin yaratadi.