Rafah operatsiyasi Isroilni HAMASni mag‘lub etishga yaqinlashtirmaydi – Oq uy

AQSH Prezidenti Jo Bayden Isroil Rafahdagi keng ko‘lamli operatsiyasi bilan G‘azo sektoridagi HAMASni yo‘q qilish maqsadiga erisha olmaydi, deb hisoblaydi. Bu haqda kecha, 9 may kuni e’lon qilingan Oq uy bayonotida so‘z boradi.

"Uning (Prezident Bayden) fikricha, Rafahni mag‘lub etish bilan bu maqsadga erishib bo‘lmaydi", degan Oq uyning milliy xavfsizlik aloqalari koordinatori Jon Kirbi jurnalistlar bilan bo‘lib o‘tgan brifingda.

Kirbining qayd etishicha, HAMAS Isroil tomonidan sezilarli bosimga uchragan va hozirda guruh rahbariyatining qoldiqlariga qarshi kurashishning tinch aholi uchun kattaroq xavf tug‘diradigan operatsiyadan ko‘ra samaraliroq usullari mavjud.

"Biz qandaydir tarzda Isroilni tark etyapmiz yoki ularga HAMASni mag‘lub etishda yordam berishni istamaymiz, degan argument haqiqatga to‘g‘ri kelmaydi", deydi Kirbi.

Isroilning yuqori martabali rasmiysi kecha, 9 may kuni Qohirada garovga olinganlarni ozod qilish bo‘yicha ehtimoliy kelishuv bo‘yicha muzokaralarning joriy raundi kelishmovchiliklarni hal qilmasdan yakunlanganini bildirdi.

"Biz hali ham oldinga yo‘l borligiga ishonamiz, ammo buning uchun har ikki tomondan ham bir oz yetakchilik kerak bo‘ladi. Muzokaralar stoliga o‘tirish va kelishuvni tuzish uchun har ikki tomondan jasorat kerak bo‘ladi", dedi Kirbi. 

Kirbining aytishicha, Rafahdagi keng ko‘lamli quruqlikdagi operatsiyaga muqobil variantlar bo‘yicha AQSH-Isroil maslahatlashuvlari davom etmoqda.