Ronaldu har bir futbolchi uchun namuna – Sadio Mane

Saudiya Arabistonining “Al-Nasr” jamoasi hujumchisi Sadio Mane sobiq futbolchi va potkast oluvchi Rio Ferdinand bilan suhbatda jamoadoshi Krishtianu Ronalduni yuksak baholab, portugaliyalik yulduzni avlodda bir marta uchraydigan professionallardan biri deb atadi.

Senegallik futbolchi “Manchester Yunayted”ning sobiq afsonasi bilan birga o‘ynash tajribasi haqida gapirdi:

“Krishtianu dunyodagi barcha futbolchilar uchun namuna. Men unga o‘xshagan boshqa o‘yinchini ko‘rmaganman. U har kuni ishlashga, g‘alaba qozonishga chanqoq, hatto 40 yoshda ham”, deydi Sadio Mane.

Shuningdek, Sadio Mane Ronalduni televizorda tomosha qilgan paytlarida u haqda ko‘p eshitganini, ammo “Al-Nasr”ga o‘tib, uning haqiqiy professionallik darajasiga bevosita guvoh bo‘lganini qo‘shimcha qildi.

“U bilan mashg‘ulotlarga birinchi bo‘lib keladi, odatdagidek, oxirgi bo‘lib ketadi. Mashg‘ulot uning qonida. Jamoaga Ronalduning ta’siri alohida” , deya qo‘shimcha qildi Mane.

Sadio Mane va Krishtianu Ronaldu “Al-Nasr” safida hozirga qadar 91 uchrashuvni birga o‘tkazgan. Saudiya Pro-ligasida ular hali yirik sovrin qo‘lga kiritmagan bo‘lsa-da, jamoadagi muhim hujum juftligiga aylangan. Juftlik jami 16 ta golga hissa qo‘shgan bo‘lib, ulardan 13 tasini Ronaldu urgan.

Ma’lumot uchun, Ronaldu 2022 yilda “Al-Nasr”ga kelgan bo‘lsa, Mane 2023 yilda “Bavariya” bilan bir mavsumdan keyin Saudiya klubiga qo‘shilgan edi.

Eslatib o‘tamiz, avvalroq Portugaliya terma jamoasi va Saudiyaning “Al-Nasr” futbol jamoasi sardori Krishtianu Ronaldu Saudiya Arabistoni valiahd shahzodasi va Bosh vaziri Muhammad bin Salmonning AQSHga tashrifi munosabati bilan Oq uyda bo‘lib o‘tgan tantanali kechki ovqatda qatnashgan edi.