Rossiya yadroviy mashg‘ulotlarga tayyorlanmoqda

Rossiya Ukrainaning ittifoqdoshlarini ogohlantirib, yadro quroli bo‘yicha mashg‘ulotlarni e’lon qildi. Bu haqda, bugun, 6 may kuni Rossiya Mudofaa vazirligi ma’lum qildi. 

Vazirlik bayonotida aytilishicha, mashg‘ulotlar G‘arbning ayrim rasmiylarining Rossiya Federatsiyasiga nisbatan provokatsion bayonotlari va tahdidlariga javobdir.

Qayd etish joizki, Rossiya strategik yadroviy kuchlari muntazam ravishda mashg‘ulotlar o‘tkazib tursa-da, bu taktik yadroviy qurollar bo‘yicha mashg‘ulotlarning birinchi marta ochiq e’lon qilinishidir. Bu e’lon Ukrainaning G‘arbdagi ittifoqchilariga ikki yildan ortiq davom etgan urushga yanada chuqurroq aralashish haqida ogohlantirish bo‘ldi. Ukrainaning ba’zi sheriklari avvalroq urush Ukrainadan tashqariga chiqib ketishi, NATO va Rossiya o‘rtasidagi mojaroga olib kelishi mumkinligidan xavotirda ekanini bildirgandi.

Xususan, Fransiya Prezidenti Emmanuel Makron o‘tgan hafta Ukrainaga qo‘shin yuborishni istisno qilmasligini takrorladi, Buyuk Britaniya Tashqi ishlar vaziri Devid Kemeron esa Kiyev kuchlari Rossiya ichidagi nishonlarga zarba berish uchun Britaniyaning uzoq masofali qurollaridan foydalanishi mumkinligini aytdi.

Kreml bu izohlarni xavfli, Rossiya va NATO o‘rtasidagi keskinlikni kuchaytiruvchi, deya baholadi. Urush allaqachon Moskva va G‘arb o‘rtasidagi munosabatlarga jiddiy taranglik keltirgan.

Taktik yadro qurollariga havo bombalari, qisqa masofali raketalar uchun kallaklar va artilleriya o‘q-dorilari kiradi va u jang maydonida foydalanish uchun mo‘ljallangan.

Taktik yadroviy qurollar butun shaharlarni yo‘q qilishga mo‘ljallangan qit’alararo ballistik raketalarni qurollantiradigan ulkan kallaklarga qaraganda kamroq rentabellikka ega.

Vazirlikning ta’kidlashicha, mashg‘ulotlar “strategik bo‘lmagan yadroviy kuchlarning jangovar vazifalarni bajarishga tayyorligini oshirish” uchun mo‘ljallangan va Prezident Vladimir Putinning buyrug‘i bilan o‘tkaziladi. Ma’lumotlarga ko‘ra, manyovrlarda Janubiy harbiy okrugning raketa bo‘linmalari hamda havo kuchlari va dengiz floti ishtirok etadi.

Muqaddasxon Sattarova