“Zapravka”larda metan narxi oshdi

O‘zbekistondagi avtomobillarga gaz to‘ldirish shoxobchalarida metan gaz narxi 5200 so‘mgacha oshdi. Bu haqda ijtimoiy tarmoq foydalanuvchilari xabar berdi. QALAMPIR.UZ manbasi ham buni tasdiqladi.

Ijtimoiy tarmoqlarda bugun, 1 maydan boshlab avtomobillarga gaz to‘ldirish shoxobchalarida metan gaz narxi 5200 so‘mgacha oshgani haqida xabarlar tarqaldi. Shu paytgacha hududga qarab 1 kub metr uchun 3900 so‘mdan 4250 so‘mgacha sotilgan metan narxining oshishi Vazirlar Mahkamasining 2024 yil 16 aprel kuni qabul qilingan “Yoqilg‘i-energetika sohasida bozor mexanizmlarini joriy etishning qo‘shimcha chora-tadbirlari to‘g‘risida”gi qarori bilan bog‘liq.

Unga ko‘ra, O‘zbekistonda joriy yil 1 apreldan elektr energiyasi va tabiiy gaz tariflari oshirilishi kerak edi. Xususan, gaz quyish shoxobchalari uchun tabiiy gaz narxi 1 kub metr uchun 1800 so‘mdan 2500 so‘mgacha (+38,9 foiz) ko‘tarilishi nazarda tutilgandi. Biroq O‘zbekiston Prezidenti Shavkat Mirziyoyev Vazirlar Mahkamasiga elektr energiyasi va gaz bo‘yicha yangi tariflarning kuchga kirish muddatini 1 maygacha kechiktirish bo‘yicha topshiriq berdi. Shu bilan bugun, 1 maydan boshlab O‘zbekistondagi avtomobillarga gaz to‘ldirish shoxobchalarida metan narxi hududlarga qarab, 5000 so‘mdan 5200 so‘mgacha oshdi.

Tabiiy gaz narxining ko‘tarilishi propanning ham birjadagi narxiga ta’sir qilib, u so‘nggi oy davomida qariyb 15 foizga yuqoriladi.

Qayd etish joiz, Vazirlar Mahkamasining 2023 yil sentyabrda qabul qilingan “Yoqilg‘i-energetika sohasida bozor mexanizmlarini joriy etishning qo‘shimcha chora-tadbirlari to‘g‘risida”gi qarorida 6 oy davomida avtomobillarga gaz to‘ldirish shoxobchalarida metan gaz narxi 3250 so‘mdan oshib ketmasligi belgilangandi. Ushbu davr tugashi munosabati bilan 2024 yil 1 apreldan bir kub metr uchun maksimal narx 3250 so‘mdan 3350 so‘mgacha oshirilib, imtiyozli davr yana ikki oyga uzaytirildi. 1 iyundan esa eng baland narxi 3750 so‘m etib belgilanib, uning amal qilish muddati 31 iyulgacha o‘zgartirildi.