Japarov Bosh prokuraturani ham “tozalashni” boshladi

Bugun, 14 fevral kuni Qirg‘iziston Bosh prokuraturasida kadrlar almashinuvi yuz berdi. Bu haqda mamlakat Prezidenti Sadir Japarovning matbuot xizmati xabar berdi.

Boymirza Maatov Qirg‘iz Respublikasi Bosh prokurorining birinchi o‘rinbosari lavozimidan ozod etildi. U mazkur lavozimda 2024 yildan buyon ishlab kelayotgan edi.

Uning o‘rniga Sadir Japarovning farmoni bilan Malik Bekturg‘anov tayinlangan. U bungacha O‘sh shahri prokurori lavozimida faoliyat yuritgan va prokuratura organlarida katta ish tajribasiga ega.

Shuningdek, davlat rahbarining farmoni bilan Zalkarbek Aqnazarov Qirg‘iz Respublikasi Bosh prokurori o‘rinbosari etib tayinlangan.

“Mazkur o‘zgarishlar prokuratura tizimidagi islohotlar doirasida amalga oshirilib, qonun ustuvorligini mustahkamlash va nazorat samaradorligini oshirishga qaratilgan”, deyiladi xabarda.

Eslatib o‘tamiz, avvalroq Qirg‘iziston Transport prokuraturasi boshlig‘i Nurg‘ozi Matisoqov egallab turgan lavozimidan ozod qilingani haqida xabar berilgan edi. Matisoqov Milliy xavfsizlik davlat qo‘mitasining sobiq rahbari Qamchibek Tashiyevning jiyani ekani aytilmoqda. Qayd etish joiz, mazkur o‘zgarishlar Tashiyevning lavozimidan ozod qilinishi fonida bo‘lmoqda.

Tashiyev iste’fosi

Joriy yilning 10 fevral kuni Qirg‘iziston Milliy xavfsizlik davlat qo‘mitasi raisi – Bosh vazir o‘rinbosari Qamchibek Tashiyev Prezident Sadir Japarovning farmoni bilan lavozimidan ozod etildi. U o‘z qarorini “jamiyatda bo‘linishga yo‘l qo‘ymaslik” istagi bilan izohladi. Qamchibek Tashiyevning o‘zi bu haqda Germaniyada yurak operatsiyasidan so‘ng rejali tekshiruvda bo‘lganida xabar topganini ma’lum qildi.

Tashiyev ortidan uning birinchi o‘rinbosari Qurbonbek Avazov, kiberxavfsizlik markazi direktori Daniel Risaliyev va Antiterror markazi direktori Elizar Smanov ishdan olindi. Abdukarim Alimboyev Milliy xavfsizlik davlat qo‘mitasi (MXDQ) raisining birinchi o‘rinbosari lavozimidan ozod etilib, Davlat chegara xizmati raisi etib tayinlandi. Uning o‘rnini Xavfsizlik kengashi kotibi lavozimida ishlab kelayotgan Rustam Mamasadiqov egalladi. 

2020 yildan buyon Milliy xavfsizlik davlat qo‘mitasining 9-xizmati boshlig‘i va rais o‘rinbosari lavozimida ishlab kelgan Jumgalbek Shabdanbekov Qirg‘iziston Milliy xavfsizlik davlat qo‘mitasi raisi vazifasini vaqtincha bajaruvchi etib tayinlandi.

Shuningdek, shu kunning o‘zida Chegara xizmati davlat qo‘mitasi tarkibidan chiqarildi.

Japarov va Tashiyev tandemi

Ma’lumot uchun, Qamchibek Tashiyev 2020 yil 16 oktyabr kuni Qirg‘iziston Milliy xavfsizlik davlat qo‘mitasi raisi etib tayinlangan edi. Farmonni 2020 yil 5–6 oktyabr voqealaridan so‘ng prezident vazifasini bajaruvchi sifatida Sadir Japarov imzolagan.

Qamchibek Tashiyev va amaldagi Prezident Sadir Japarov o‘rtasidagi ko‘p yillik munosabatlar mamlakatdagi eng barqaror va ta’sirli siyosiy ittifoqlardan biri sifatida baholanib kelgan. Ularning hamkorligi hokimiyat tepasiga kelishidan ancha oldin boshlangan: 2010 yillar boshida ular bir necha bor siyosiy jarayonlarda bir tomonda bo‘lgan, 2012 yildagi umumiy jinoiy epizodni ham birga boshdan kechirgan, bu esa ularning shaxsiy yaqinligini yanada mustahkamlagan.

2020 yil oktyabr voqealaridan so‘ng tandem yakuniy shaklga keldi: Sadir Japarov Prezident lavozimini egalladi, Qamchibek Tashiyev esa MXQ rahbari etib tayinlanib, kuch blokining asosiy tayanchiga aylandi. Aynan u eng shov-shuvli ishlarni nazorat qilgan, kuch siyosatini shakllantirgan va amalda Prezident jamoasining eng yaqin ishonchli shaxslaridan biri bo‘lib kelgan.

Ekspertlar orasida ularning ittifoqi ko‘pincha mamlakatdagi eng mustahkam siyosiy duet deb atalardi, Qamchibek Tashiyev atrofidagi har qanday kadr o‘zgarishlari esa hokimiyat konfiguratsiyasidagi jiddiy o‘zgarishlar belgisi sifatida qabul qilinar edi.

So‘nggi paytlarda siyosiy doiralarda maxsus xizmat rahbarining bo‘lajak Prezident saylovlarida ishtirok etishi mumkinligi haqida mish-mishlar tarqalgan edi. Qamchibek Tashiyev esa bir necha bor prezidentlik poygasida qatnashmoqchi emasligini va Sadir Japarovni qo‘llab-quvvatlashini ma’lum qilgan.