Ҳиндистонда Мессининг 21 метрли ҳайкали қурилди (видео)

Аргентиналик футбол афсонаси Лионель Месси шарафига дунёдаги энг катта деб ҳисобланган 21 метрлик темир ҳайкал Калкуттанинг Жанубий Дум-Дум шаҳрида қуриб битказилди. Бу ҳақда “Thestatesman” нашри хабар берди.

Ҳайкалда Месси қўлида Жаҳон чемпионати кубогини ушлаб турган ҳолда тасвирланган ва ҳозирда ҳайкалнинг сирт ишлари якунланмоқда. Ғарбий Бенгал вазири Сужит Босе ҳайкал атиги 40 кун ичида қуриб битказилганини таъкидлади: 

“Бу жуда катта ҳайкал, баландлиги 21 метр. Дунёда Мессининг бунчалик катта ҳайкали йўқ. Калкуттага ташриф буюрадиган мухлислар жуда кўп. Биз бунга шахсан тайёрландик”, дейди Сужит Босе.

Ташкилотчиларга кўра, Месси ҳайкали расмий очилиш маросими эртага, 13 декабрь куни бўлиб ўтади. Бу тадбирда Месси хавфсизлик ва қонун-тартибот сабабли шахсан иштирок эта олмайди, шунинг учун маросим виртуал тарзда ўтказилади.

Эслатиб ўтамиз, аввалроқ Аргентинанинг Мар-дель-Плата шаҳри марказидаги Эл Нуэво Мундиал кафеси кириш қисмида жойлашган Лионель Мессининг ҳайкали бутунлай вайрон бўлган ҳолда топилган эди.