Ҳужжатсиз дориларни чегарадан олиб ўтишга уринганлар ушланди

Тошкент вилоятининг “Навоий” ҳамда “Ойбек” чегара божхона постида амалдаги талабларга зид равишда умумий қиймати 175,5 млн сўмни ташкил қилувчи биологик фаол қўшимчалар ва дори воситаларини олиб киришга уринишлар аниқланди. Бу ҳақда вилоят божхона бошқармаси хабар берди.

Қайд этилишича, йўловчига тегишли автомобилнинг юкхонаси текширилганда божхона назоратига тақдим этилмаган 603 дона турли хил биологик фаол қўшимчалар борлиги аниқланган. Шунингдек, автомобилнинг ичидан қиймати 70 млн сўмлик тиббиёт воситалари топилган.

Қолаверса, қўл юклари божхона назоратидан ўтказилганда 185 дона турли хил тиббиёт буюмлари мавжудлиги аниқланган. Бундан ташқари, “Ойбек” чегара божхона пости орқали ўтаётган йўловчининг қўл юкларида ҳеч қандай ҳужжатларсиз 1 050 дона тиббиёт воситалари борлиги фош этилган. Аниқланган дори ва тиббиёт воситаларининг умумий қиймати дастлабки ҳисоб-китобларга кўра, 175,5 млн сўмни ташкил этган.

Эслатиб ўтамиз, аввалроқ Андижонда қўшни давлатдан ноқонуний олиб келинган 226 млн 343 минг сўмлик биологик фаол қўшимчалар фош этилганди.