14 килодан ортиқ “опий”ни 180 минг долларга сотаётган шахс ушланди

Тошкент шаҳрида 14 килодан ортиқ “опий”ни 180 минг АҚШ долларига сотаётган шахс қўлга олинди. Бу ҳақда Давлат божхона қўмитаси хабар берди.

Қайд этилишича, “Тошкент-Аэро” ихтисослаштирилган божхона комплекси тезкор тузилмалари томонидан гиёҳвандлик воситаларининг ноқонуний олиб кирилиши ва ички ҳудуддаги яширин айланмасига қарши навбатдаги тезкор тадбирлар ўтказилган.

Пойтахт аэропортида Бишкекдан учиб келган қўшни давлат фуқароси божхонадан “яшил” йўлак орқали ҳаракатланиб, чамадонида синтетик гиёҳвандлик воситаларини олиб киришга урингани фош қилинган. Гўёки спорт озуқаси тарзида олиб ўтилаётган 2 та қутидаги 684 дона капсула таркибида 560,75 гр альфа-ПВП синтетик гиёҳвандлик моддаси мавжудлиги аниқланган.

Шундан сўнг мазкур наркожиноятнинг илдизига етиб бориш мақсадида комплекснинг Контрабандага қарши курашиш шўъбаси томонидан Давлат хавфсизлик хизмати ва ички ишлар идоралари вакилларини жалб қилган ҳолда Тошкент шаҳрида тезкор тадбир ўтказилган. Яъни, хориждан олиб кирилган 560,75 гр альфа-ПВП синтетик гиёҳвандлик моддасини қабул қилиб олиши керак бўлган шахс ҳам Бектемир туманида қўлга олинган.

Ушбу шахснинг хонадони белгиланган тартибда кўздан кечирилганида, бу ерда 114 дона капсулада тахминан 80 гр оғирликдаги альфа-ПВП синтетик гиёҳвандлик моддаси ва уларни тарқатиш учун ҳозирланган 37 дона ўрамчалар, 2 гр оғирликдаги “марихуана”, 2 дона ўрамда 30 гр оғирликда бошқа турдаги синтетик наркотик модда, 4 дона электрон тарози, изоленталар ва зип пакетлар мавжудлиги аниқланиб, далилий ашё тариқасида олинган.

Шунингдек, “Тошкент-Аэро” ИБК Контрабандага қарши курашиш шўъбаси томонидан Сурхондарё вилояти божхона бошқармаси ва Давлат хавфсизлик хизмати билан ҳамкорликда Сариосиё туманида навбатдаги тезкор тадбир ўтказилган.

Тезкор тадбирда аввалдан кузатувга олинган шахс ёнидаги 14 дона ўрамга жойланган 14 кг 680 гр оғирликдаги “опий” гиёҳвандлик воситасини 180 минг АҚШ долларига сотаётган вақтида қўлга олинган.
Ҳозирда ҳар иккала ҳолат юзасидан божхона органлари томонидан жиноят ишлари қўзғатилган.

Маълумот учун, республика божхоначилари йил бошидан буён аниқланган 171 та ҳолатда 383 килограммдан зиёд гиёҳвандилк воситаларининг божхона чегаралари орқали олиб ўтилиши ва ички ҳудуддаги яширин айланмасига чек қўйган.

Эслатиб ўтамиз, аввалроқ Сурхондарё вилоятининг Сариосиё туманида ўқитувчи 180 минг АҚШ долларига наркотик сотаётганида қўлга тушган эди.