Самарқандда вояга етмаган қиз зўрланди. Гумонланувчилар 4 та

Ёлғиз аёл сифатида фарзандларини боқиш илинжида хорижга ишлаш учун кетган онанинг 14 ёшли қизи 4 нафар вояга етган шахс томонидан калтакланиб, зўрлангани айтилмоқда. Бу ҳақда QALAMPIR.UZ таҳририятига мурожаат қилган жабрланувчининг онаси маълум қилди.

Унинг айтишича, қизига нисбатан содир этилган зўравонлик ҳолати юзасидан ички ишлар органлари ишга совуққон муносабат билдирмоқда. Она бундан норози.

“2025 йил декабрь ойида Россиядан келганман. Қўшним менга қизим “куругда” қолиб кетганини айтди. Қизимдан сўраганимда ҳақиқатдан ҳам тўртта бола зўрлаганини айтди. Шундан сўнг ИИБга бориб ариза ёздик. Зўравон болалардан бири бегона бўлмаган, у қизимнинг тутинган акаси бўлган. У бола қизимга мен билан гаплаш деган, лекин қизим гаплашмайман, деган шундан кейин улар ака-сингилликка келишган бўлган”, дейди она.

Мурожаатчининг сўзларига кўра, жиноятда гумонланаётган 4 нафар шахсдан фақат биттасига нисбатан эҳтиёт чораси сифатида қамоққа олиш қўлланган. Қолган гумонланувчилар эса озодликда юрибди. Онанинг айтишича, тергов жараёнида унга ишни ёпиш эвазига ҳатто пора ҳам таклиф қилинган.

“Озгина бўлса ҳам кўнглингиздан ўтгани йўқми? Агар бор бўлса, иш ёпиларди”, деб бош терговчи мендан сўради. Мен эса кулиб йўқ дедим. Гап боламнинг ҳаёти ҳақида кетяпти. Қўлимда экспертиза хулосалари бор, охиригача курашаман”, дейди у.

Таҳририят жабрланувчи қиз билан ҳам суҳбатлашди. Унинг айтишича, ҳозирда руҳий аҳволи оғир. Қиз айбдорлар тезроқ қонуний жазо олишини истаётганини ҳамда бу ерлардан бутунлай кетишни хоҳлаётганини билдирди.

Воқеа юзасидан Болалар омбудсмани ҳамда Хотин-қизлар қўмитасига мурожаат қилиниб, вазият баён этилган. У мурожаатчиларга ёрдам кўрсатилишини маълум қилганди. Бироқ орадан 10 кун ўтиб мурожаатчи билан қайтадан боғланганимизда, у ҳеч қандай амалий ёрдам кўрсатилмаганини билдирди.

Мазкур ҳолат юзасидан Ўзбекистон Республикаси Бош прокуратураси билан боғланилди. Идора матбуот котиби Ҳаёт Шамсутдинов маълум қилишича, 2026 йил 23 январь куни қўзғатилган жиноят иши дастлаб Жиноят кодексининг 128-моддаси (ўн олти ёшга тўлмаган шахс билан жинсий алоқа қилиш) 1-қисми билан квалификация қилинган. Кейинчалик иш Жиноят кодексининг 118-моддаси (номусга тегиш) 3-қисми “а” бандига қайта малакаланган. Ҳозирда жиноят иши доирасида 4 нафар шахс терговга жалб қилинган бўлиб, тергов ҳаракатлари Каттақўрғон тумани ИИБ ҳузуридаги тергов бўлими томонидан олиб борилмоқда.

Воқеа тафсилотлари билан батафсил танишиш учун QALAMPIR.UZ‘нинг YouTube’даги саҳифаси орқали ушбу видеони томоша қилинг.