АҚШ Эрон қирғоқлари яқинида йирик техникаларини тўплади

Эрон билан муносабатлар кескинлашгани фонида Вашингтон Яқин Шарққа катта ҳарбий куч юборяпти. Бу ҳақда “Bloomberg” хабар берди.

Унга кўра, бу сўнгги 20 йил ичида минтақадаги энг катта Америка ҳарбий гуруҳи ҳисобланади.

Ҳозир у ерда камида иккита авианосец бор. Январдан бери Араб денгизида USS Abraham Lincoln авианосеци ва бошқарилувчи ракетали эсминецлар турибди. Яқинда эса АҚШ энг йирик авианосеци – Gerald R. Ford’ни ҳам қўшимча кемалар билан бирга жўнатди.

Кузатув хизмати “Flightradar24” маълумотларига кўра, Америка ҳарбий транспорт самолётлари, ёқилғи қуйиш самолётлари ва разведка самолётлари қатнови кескин ошган. Улар Қатар, Иордания, Крит ороли ва Испаниядаги базаларга учмоқда. Жумладан, оғир ҳарбий техникани ташишда ишлатиладиган C-130J Super Hercules самолётлари ҳам юборилган.

Нашр бу кучларни 2003 йилда, АҚШ Ироққа бостириб киришидан олдинги тўпланган кучлар билан таққосламоқда. Лекин ҳозирча Америка қуруқлик қўшинларини киритиш ниятида эмас. ОАВнинг ёзишича, Дональд Трамп Эронни тезроқ ядровий келишувга мажбур қилиш учун зарба бериш имконини кўриб чиқмоқда.

Трамп яқинда Эронни келишувни чўзса, жуда ёмон оқибатлар бўлиши билан огоҳлантирди. У Теҳронга 10–15 кунлик муддат берган. Айни пайтда у музокаралар яхши кетаётганини айтган, лекин шу муддат ичида аниқ келишувга эришишни талаб қилган.

Шу ҳафта Женевада Эрон ва АҚШ ўртасида билвосита музокараларнинг иккинчи босқичи бўлиб ўтди. Томонлар эҳтимолий ядровий келишувнинг “асосий тамойиллари” бўйича келишиб олгани айтилмоқда.

Хабарларга кўра, Эрон уранни бойитишни уч йилгача тўхтатиб туриш, захираларнинг бир қисмини чет элга чиқариш ва санкциялар бекор қилинса, АҚШ билан иқтисодий келишувларни муҳокама қилишга тайёрлигини билдирган. Аммо Теҳрон бойитиш жараёнини ўз ҳудудида сақлаб қолишни истаяпти, Вашингтон эса бунга қарши.

Эслатиб ўтамиз, аввалроқ Эрон яқин икки-уч кун ичида ядровий музокаралар бўйича АҚШга таклиф лойиҳасини тайёрлаши ҳақида хабар берилганди.