АҚШ Эрон туфайли Европага қурол сотишни кечиктирди – ОАВ

Америкалик мулозимлар баъзи европалик ҳамкасбларини Эрон билан давом этаётган уруш фонида АҚШ заҳиралари камайиб кетгани сабабли, аввал тузилган шартномалар бўйича қурол етказиб беришда кечикишлар бўлиши мумкинлиги ҳақида хабардор қилди. Бу ҳақда кеча, 16 апрель куни вазиятдан хабардор бешта манбага таяниб, “Reuters” хабар берди.

Нашр манбаларининг сўзларига кўра, кечикишлар Европанинг бир қанча давлатларига, жумладан, Болтиқбўйи ва Скандинавия минтақаларига таъсир қилади. Гап, хусусан, хорижий ҳарбий сотувлар (FMS) дастури доирасида сотиб олинган қуроллар ҳақида бормоқда. Манбаларнинг айтишича, АҚШ расмийлари европалик ҳамкасблари билан ёзишмаларда ушбу етказиб беришлар катта эҳтимол билан ортга сурилишидан огоҳлантирган.

Оқ уй ва Давлат департаменти журналистларнинг сўровларини Пентагонга йўналтирган, Пентагон эса ҳозирча изоҳ беришдан бош тортган.

“Бу кечикишлар 28 февралда Америка-Исроил авиазарбалари билан бошланган Эронга қарши уруш АҚШнинг баъзи ўта муҳим қурол ва ўқ-дорилар заҳираларини нақадар камайтириб юборганини кўрсатади”, дейилади хабарда. 

“Reuters” қайд этишича, европалик мулозимлар бу кечикишлар уларни қийин аҳволга солиб қўяётганидан шикоят қилмоқда. FMS дастури чет эл давлатлари томонидан АҚШ ҳукуматининг розилиги ва тегишли логистик кўмаги билан Америка қуролларини сотиб олишни назарда тутади. Дональд Трамп Президентлиги даврида Вашингтон НАТОдаги европалик иттифоқчиларини Европа мудофааси учун масъулиятни қисман америкаликлардан европаликларнинг ўзларига ўтказиш мақсадида бундай харидларни кўпайтиришга фаол чақирган эди.

Бироқ таъминот тез-тез кечикмоқда ва европаликлар борган сари кўпроқ ўзларининг қурол тизимларига эътибор қаратмоқда. Америкалик мулозимлар эса қурол-яроғ Яқин Шарқдаги уруш учун кераклигини айтиб, Европа давлатларини АҚШ ва Исроилга Ҳормуз бўғозини очишда ёрдам беришни истамаётганликда айбламоқда.