Эрон Ҳормуз бўғозини яна ёпиб қўйди

Кеча, 18 апрель куни Эрон АҚШ томонидан давом этаётган денгиз блокадаси сабаб Ҳормуз бўғози яна ёпилганини маълум қилди. Бу ҳақда IRNA хабар берди.

Маълум қилинишича, Эроннинг “Хатам ал-Анбиё” марказий қўмондонлиги расмий вакили АҚШнинг денгиздаги ҳаракатлари давом этаётгани сабаб бўғоз яна ёпилганини билдирган.

Унинг сўзларига кўра, Эрон илгари эришилган келишувларга амал қилган ҳолда ва ҳалол ёндашув асосида Ҳормуз бўғози орқали чекланган миқдордаги нефть ва савдо кемаларининг назорат остида ўтишига рухсат берган. Бироқ АҚШ яна “хиёнаткорлик” кўрсатиб, блокада ниқоби остида денгиздаги ноқонуний ҳаракатларни давом эттирмоқда. Шу сабабли Ҳормуз бўғози устидан назорат яна аввалги қатъий ҳолатга қайтарилган ва бу муҳим стратегик сув йўли Эрон Қуролли кучлари томонидан қаттиқ назорат остига олинган.

Шунингдек, қўмондонлик вакилининг таъкидлашича, АҚШ Эрон томон йўл олган ва Эрондан чиқаётган барча кемалар учун тўлиқ эркин ҳаракатланишни тикламагунча, Ҳормуз бўғозидаги вазият ўзгармайди ва қатъий назорат сақланиб қолади.

Эслатиб ўтамиз, бундан бир кун олдин Эрон Ташқи ишлар вазири Аббос Ароқчи Ҳормуз бўғози тижорат кемалари учун очилганини маълум қилганди. Шундан сўнг АҚШ Президенти Дональд Трамп Эрон томонига миннатдорлик билдириб, пост эълон қилган.

Бироқ ўша куннинг ўзида АҚШ Президенти АҚШ Эрон портларига нисбатан денгиз блокадасини, Ҳормуз бўғози очилганига қарамай, давом эттиришини ҳам билдирган.