АҚШ Россия нефтига қўйилган айрим санкцияларни бекор қилди

Бугун, 13 март куни АҚШ Россия нефть маҳсулотларини кемаларда ташишга қўйилган айрим чекловларни вақтинча бекор қилди. Бу ҳақда АҚШ Молия вазирлигининг Хорижий активларни назорат қилиш бошқармаси (OFAC) берган махсус лицензияда сўз боради.

Ҳужжатга кўра, 2026 йил 12 мартгача кемаларга юкланган Россия нефть маҳсулотларини етказиб беришга рухсат берилган. Ушбу лицензия эса 2026 йил 11 апрелгача амал қилади.

АҚШ Молия вазири Скотт Бессент Х ижтимоий тармоғидаги саҳифасида бу қарор Президент Дональд Трампнинг глобал энергия бозорида барқарорликни таъминлаш ва нефть нархларини паст даражада ушлаб туриш бўйича чораларидан бири эканини таъкидлади. Унинг айтишича, АҚШ ҳозирда денгизда бўлган Россия нефтини мамлакатларга сотиб олишга вақтинчалик рухсат бермоқда. Бессент бу чорани қисқа муддатли деб атаб, у Россия учун катта иқтисодий фойда келтирмаслигини билдирган.

Жорий йил 6 март ҳолатига кўра, танкерлар орқали тахминан 130 миллион баррель Россия нефти ташилган. Санкциялар сабаб бу юкларнинг катта қисми кечиккан. АҚШ рухсатидан сўнг Ҳиндистон нефтни қайта ишлаш заводлари қарийб 30 миллион баррель нефтни сотиб олган.

Россия Президентининг махсус вакили Кирилл Дмитриевнинг айтишича, АҚШ томонидан берилган бу рухсат тахминан 100 миллион баррель Россия нефтига таъсир кўрсатиши мумкин.

Маълумот учун, февраль ойи охирида АҚШ ва Исроил Эронга ҳужум бошлаганди. Бунга жавобан Теҳрон Исроил ва Вашингтон иттифоқчиси ҳисобланган давлатларга ҳужум қилмоқда. Эрон, шунингдек, дунё нефть таъминотининг қарийб чорак қисми ўтадиган Ҳормуз бўғозини тўсиб қўйди. Бу эса жаҳон бозорида нефть нархининг кескин ошишига олиб келди.

Жорий йилнинг 9 март куни Брент маркали нефть нархи бир баррель учун деярли 120 долларга етди. Бу кўрсаткич 2022 йил июнидан бери илк бор қайд этилди. Эрон Ислом инқилоби қўриқчилари корпуси эса нефть нархларини сунъий равишда чеклаб бўлмаслигини билдириб, бозорда нефть нархи 200 долларгача кўтарилиши мумкинлигидан огоҳлантирди.

Эслатиб ўтамиз, аввалроқ АҚШ Эрондаги уруш фонида нефть бозорига ёрдам бермоқчилиги ҳақида хабар берилганди.