АҚШда 30 дан ортиқ машина автоҳалокатга учради. Қурбонлар бор (видео)

Жорий йилнинг 17 февраль куни АҚШнинг Колорадо штатида кучли шамол оқибатида 30 дан ортиқ автомобиль иштирокида йирик йўл-транспорт ҳодисаси юз берди. Бу ҳақда штат полициясига таяниб, “The New York Post” нашри хабар берди.

Нашрнинг ёзишича, оммавий ЙТҲ Пуэбло яқинидаги федерал автомагистралда содир бўлган. Ҳалокатга бир нечта юк машиналари, ҳайвон ташиш учун мўлжалланган тиркамали пикаплар ва енгил автомобиллар қўшилган.

Колорадо штати йўл-патруль хизмати майори Брайан Лайонснинг сўзларига кўра, турли транспорт воситаларида бўлган 4 кишининг ҳалок бўлгани тасдиқланган. Яна камида 29 киши турли даражадаги тан жароҳатлари билан маҳаллий шифохоналарга етказилган.

Қайд этилишича, 30 та автомобиль тўқнашуви ноқулай об-ҳаво шароитида, жумладан, кучли шамол туфайли юз берган. Шамол чанг-тўзон кўтариб, ҳаракатланиш учун хавфли вазиятни юзага келтирган ҳамда йўлнинг айрим қисмларида электр таъминотининг қисман узилишига сабаб бўлган.

“Кўриш даражаси деярли нолга тенг эди”, дейди Лайонс.

Автомобиллардан бирида 32 та эчки ортилган тиркама ҳам бўлган: улардан 4 таси нобуд бўлган, қолганлари эса хавфсиз эвакуация қилинган. Ҳозирда оммавий ЙТҲ юзасидан тергов ҳаракатлари олиб борилмоқда, ҳодиса тафсилотлари ўрганилмоқда.

Эслатиб ўтамиз, аввалроқ АҚШнинг Мичиган штатидаги автомагистралда музлама сабабли 100 дан ортиқ автомобиль тўқнашиб кетганди. Йўл-транспорт ҳодисаси оқибатида 19 киши жароҳат олган.