Ақтауда қулаган AZAL самолёти: янги тафсилотлар очиқланди

north_east

AZAL самолёти қуладими ёки қулатилдими? Ҳалокат бўйича дастлабки ҳисобот эълон қилинди (фото)

Қозоғистон Транспорт вазирлиги Ақтау шаҳри яқинида бир йил аввал қулаган Azerbaijan Airlines (AZAL) самолёти бўйича навбатдаги ҳисоботни эълон қилди. Унда ҳаво кемасидаги шикастланишларнинг эҳтимолий сабаби кўрсатиб ўтилди. Бу ҳақда “Oxu.az” хабар берди.

Вазирлик маълумотига кўра, авиация ҳодисасини тергов қилиш доирасида аниқланган бегона металл буюмлар юзасидан трасологик, баллистик, портлаш-техник ва ёнғин бўйича экспертизалар ўтказилган, яъни гап ташқи объектлар ҳақида бормоқда.

“Экспертиза натижаларига кўра, портловчи моддалар излари аниқланмади. Тадқиқот учун тақдим этилган учта кислород баллонида портлаш аломатлари йўқ. Ҳаво кемасидаги шикастланишлар тахминан жанговар қисмнинг зарба берувчи элементлари таъсирида юзага келган, бироқ уларнинг қайси манбага тегишли эканини аниқлашнинг имкони бўлмади”, дейилади дастлабки ҳисоботда. 

Шунингдек, гидравлик тизимнинг қувур бўлагига нисбатан экспертиза ҳам ўтказилган. Тадқиқот натижаларига кўра, қувурда шикастланишлар аниқланган.

“Шикастланиш механизми қаттиқ жисмлар билан тўқнашув натижасида металлнинг ёрилиши билан изоҳланади. Тешик кўринишидаги шикастлар металл қотишмаларидан тайёрланган металл бўлаклар (ташқи объектлар) таъсирида юзага келган бўлиши мумкин”, дейилади ҳисоботда. 

Эслатиб ўтамиз, ҳалокат 2024 йил 25 декабрь куни содир бўлган. Борт Баку шаҳридан Грознийга йўл олган, бироқ Чеченистонда қўна олмаган ва Қозоғистоннинг Ақтау шаҳри яқинида қулаган. Самолёт бортида бўлган 67 кишидан 39 нафари, жумладан, 16 россияликдан 7 нафари ҳалок бўлган.

Росавиация Грознийда қўниш амалга ошмаганини туман ва Украина томонидан уюштирилган “ҳужумлар” сабаб жорий этилган режа билан изоҳлаган. Путин Россиянинг вазифаси ҳодисага “холис баҳо бериш” эканини таъкидлаб, компенсациялар бўйича зарур чоралар кўрилишини ваъда қилган.

Жорий йилнинг июль ойида Россия Президенти матбуот котиби Дмитрий Песков агар Озарбайжон AZAL самолёти ҳалокати юзасидан Россияга қарши судга мурожаат қилишга қарор қилса, бу унинг ҳуқуқи эканини айтган. У Россия-Озарбайжон муносабатларида мураккаб давр бошланганини, бироқ Москва вазият тез орада барқарорлашишига умид қилаётганини билдирган.