“Барселона” президентлиги учун номзодлар тасдиқланди

Испаниянинг “Барселона” жамоаси президентлик сайлови учун номзодлар рўйхатини эълон қилди. Рўйхатда Жоан Лапорта ва Виктор Фонт клуб президенти лавозимига номзод сифатида киритилган. Бу ҳақда клуб матбуот хизмати хабар берди.

Расмий номзод сифатида тасдиқланиш учун 2337 та имзо тўплаш керак бўлган. Иккала номзод ҳам белгиланган чегарадан ошиб, талабни бажарди. Учинчи номзод Марк Сириа Роиг керакли миқдордаги имзоларни тўплай олмаган. Шу сабаб у сайловда иштирок этолмайди.  

“Барселона” президентлик сайловлари жорий йилнинг 15 март куни бўлиб ўтади. Клубнинг амалдаги президенти Жоан Лапорта иккинчи муддатга номзодини қўймоқда. Бундан аввалроқ Лапорта февраль ойида директорлар кенгашининг бир қисми билан қайта сайланиш учун истеъфога чиққанди.

Маълумот учун, 63 ёшли Лапорта “Барселона”ни 2003-2010 йилларда бошқарган ва 2021 йилда яна клуб президенти лавозимини эгаллаган. Унинг раҳбарлигида “Барселона” 6 марта Испания Ла Лигасида, 3 марта Испания кубоги, 6 марта Испания Суперкубоги, 2 марта Чемпионлар лигаси, 1 марта UEFA Суперкубоги, 1 марта Клублар ўртасидаги жаҳон чемпионати ғолиби бўлган.