Лапорта қайта сайланмаса, Флик жамоани тарк этиши мумкин

“Барселона” клуб президенти этиб Жоан Лапорта қайта сайланмаса, “Барселона” бош мураббийи Ханс-Дитер Флик жамоани тарк этиши мумкин. Бу ҳақда журналист Флориан Плеттенберг ижтимоий тармоқдаги саҳифасида маълум қилди.

Манбага кўра, германиялик мутахассис “Барселона” билан шартномасини узайтиришга қизиқмоқда. Флик шаҳарни, клубни ва унинг мухлисларини яхши кўради. Бироқ мураббий ўз келажагини айнан Жоан Лапортанинг клубдаги лавозими билан боғламоқда ва жамоа стратегиясини шакллантиришда у билан ишлашни истайди.

Қайд этилишича, агар Лапорта 15 март куни бўлиб ўтадиган сайловда “Барселона” президенти этиб қайта сайланмаса, Флик ёзда ёки амалдаги шартномаси 2027 йилда якунлангач клубни тарк этиши мумкин.

Маълумот учун, айни пайтда Испания чемпионатида 26 та турдан сўнг Филк бошчилигидаги “Барселона” жамоаси 64 очко жамғариб, турнир жадвалида “Реал Мадрид”дан тўрт очко олдинда пешқадамлик қилмоқда.