“Бир кун кўришмасанг, гўё уч куз ўтгандек”. Путин Си Цзиньпинга “пахта” қўйди (видео)

Россия Президенти Владимир Путин ва Хитой Халқ Республикаси раиси Си Цзиньпин Пекинда расмий музокараларни бошлади. Бу ҳақда “Риа новости” хабар берди.  

Путин бугун, 20 май куни эрталаб Пекин марказидаги Тяньаньмэнь майдонида жойлашган Халқ йиғинлари саройига етиб келди. У ерда Россия раҳбарини шахсан Си Цзиньпин кутиб олди. Учрашув аввалида икки давлат етакчилари бир-бирини кўп йиллик дўст деб атаган.

“Хитойда шундай дейишади: бир кун кўришмасанг, гўё уч куз ўтгандек бўлади”, деган Путин Хитой мақолини келтириб.

Россия президенти бу йил 25 йиллиги нишонланаётган қўшничилик, дўстлик ва ҳамкорлик тўғрисидаги шартномани икки мамлакат ўртасидаги муносабатларнинг асоси деб атаган. Унинг таъкидлашича, шу давр ичида ўзаро савдо ҳажми 30 бараварга ўсиб, 200 миллиард доллардан ошган.

“Бугун муносабатларимиз мисли кўрилмаган даражада юқори босқичга чиқди ва ҳақиқий кенг қамровли шериклик ҳамда стратегик ҳамкорлик намунасига айланди”, деган Путин.

Унинг сўзларига кўра, Россия ва Хитойнинг ташқи сиёсатдаги ҳамкорлиги халқаро муносабатлардаги асосий барқарорлаштирувчи омиллардан бири ҳисобланади. У Москва ва Пекин янада адолатли ва демократик жаҳон тартибини шакллантиришга интилаётганини таъкидлаган.

Путин икки томонлама муносабатларда юқори технологиялар, саноат ва қишлоқ хўжалиги соҳаларини устувор йўналиш деб атаган. Шунингдек, Россия ва Хитой ўзаро визасиз тартиб амалиётини давом эттиришини билдирган. Россия Президенти Си Цзиньпинни 2027 йилда Россияга ташриф билан келишни таклиф қилди ҳамда кузда Шэньчжэнь шаҳрида ўтадиган Осиё–Тинч океани иқтисодий ҳамкорлиги саммитида иштирок этишга тайёрлигини билдирган.

“Хитой–Россия муносабатлари сиёсий ўзаро ишонч ва стратегик ҳамкорликни мустаҳкамлаш жараёнидаги қатъий ирода туфайли босқичма-босқич ҳозирги юқори даражага чиқди”, деган Хитой раҳбари.

У халқаро вазият мураккаблашиб, дунёда бўлиниш ва устунликка интилиш кучайганига қарамай, тинчлик, тараққиёт ва ҳамкорликка интилиш ҳамон халқларнинг асосий истаги бўлиб қолаётганини таъкидлаган.

Си Цзиньпин Россия ва Хитой дунёнинг муҳим давлатлари ҳамда Бирлашган Миллатлар Ташкилоти Хавфсизлик Кенгаши аъзолари сифатида янада адолатли глобал бошқарув тизимини шакллантириши лозимлигини билдирган. Шунингдек, у 25 йил аввал имзоланган Қўшничилик, дўстлик ва ҳамкорлик шартномаси икки давлат муносабатларида катта ривожланишга йўл очганини қайд этиб, Пекин келишув муддатини узайтиришни қўллаб-қувватлашини айтган.

Эслатиб ўтамиз, Путин Хитойга 19 май куни кечқурун етиб борганди. Уни аэропортда Хитой ташқи ишлар вазири ва Хитой Коммунистик партияси Марказий қўмитаси комиссияси раҳбари Ван И кутиб олганди. Томонлар халқаро муҳим масалалар билан бирга, углеводородлар соҳасидаги ҳамкорлик ва “Сибир қудрати – 2” газ қувури лойиҳасини ҳам батафсил кўриб чиқиши кутилмоқда.  

Маълумот учун, Путин билан бирга Пекинга Россия ҳукумати ва йирик бизнес вакилларидан иборат делегация ҳам келган. Улар орасида биринчи Бош вазир ўринбосари Денис Мантуров, Ташқи ишлар вазири Сергей Лавров, Россия Марказий банки раиси Эльвира Набиуллина, “Роснефть” раҳбари Игорь Сечин ва “Газпром” раҳбари Алексей Миллер бор.