Бишкекда Путин келиши олдидан Украина элчихонаси “яшириб қўйилди”
Олам
−
28 Ноябрь 2025 7199 2 дақиқа
Бишкекда Украина элчихонаси биноси ва унинг тўғрисидаги кўча орқасида жойлашган Қирғизистон Президенти резиденцияси ўртасига улкан LED-экран ўрнатилди. Бу Россия Президенти Владимир Путиннинг кеча, 27 ноябрь куни бўлиб ўтган Коллектив хавфсизлик шартномаси ташкилоти саммитида қатнашиш учун келиши олдидан амалга оширилди.
20 ноябрь куни журналист Григорий Пирлик Telegram-каналида экран ҳақида хабар берган. У эълон қилган суратларга кўра, бир неча қаватли бинога тенг баландликдаги иншоот шундай жойлаштирилгани акс этганки, “Ынтымак Ордо” Президент ва ҳукуматнинг янги резиденцияси томондан экранни тўлиқ кўришга девор тўсқинлик қилади. Бироқ экран Украина элчихонасидаги байроқни беркитиб қўяди.
Қирғизистон Президенти матбуот хизматига кўра, улкан LED-экран “ҳукумат видеоматериалларини намойиш қилиш ва расмий тадбирларни визуал кузатиш учун” ўрнатилган. Бир қатор ОАВлар конструкция Путин ташрифи билан боғлиқ бўлиши мумкинлигини тахмин қилган. Украинанинг Қирғизистондаги элчихонасининг маслаҳатчиси Денис Автономов эса бу вазиятда: “Сабаб-оқибат боғлиқлиги аён”, дея изоҳ билан чекланди.
Сиёсий таҳлилчи Турат Акимов “Азаттык” радиосига маълум қилишича, бу ҳолат ФСО – Путинни қўриқловчи махсус хизмат билан боғлиқ бўлиши мумкин. Унинг айтишича, россиялик хавфсизлик ходимлари одатда тадбирдан ўн кун олдин келиб, бутун ҳудудни текшириб чиқади. Улар Украина элчихонасидан Путинга таҳдид бўлиши мумкин деб ҳисоблаган бўлиши мумкин ва Қирғизистон томони ушбу “хавф”ни бартараф этиши керак бўлган.
Маълумот ўрнида, Владимир Путин 24 ноябрь куни Бишкекка етиб келди, эртаси куни Қирғизистон ва Россия ўртасидаги музокаралар бўлиб ўтди. Кеча, 27 ноябрда эса “Ынтымак Ордо”да бўлиб ўтган КХШТ саммитида иштирок этди. Шундан сўнг, Путин Қирғизистондаги сафарини якунлаб, Россияга қайтиб кетди.
Эслатиб ўтамиз, кеча, 27 ноябрь куни Владимир Путин Қирғизистонга ташрифи якунлари ва Коллектив хавфсизлик шартномаси ташкилоти саммити бўйича матбуот анжуманида Украина қўшинлари эгаллаб турган ҳудудлардан чиққачгина жанговар ҳаракатлар бутунлай тўхатилишини айтганди.
