БМТ Украинада тинчликни қўллаб-қувватловчи резолюцияни қабул қилди. Ўзбекистон қандай овоз берди?

БМТ Бош Ассамблеяси кеча, 24 февраль куни АҚШнинг Нью-Йорк шаҳрида бўлиб ўтган йиғилишда Украинада тинчликни қўллаб-қувватлаш ҳақидаги резолюцияни қабул қилди. Бу ҳақда ташкилот расмий сайтида маълум қилинди.

“Украинада барқарор тинчликни қўллаб-қувватлаш” деб номланган резолюция учун 107 давлат овоз берган, 12 давлат қарши чиққан, 51 мамлакат бетараф қолган.

Қарши овоз берган 12 давлат – Россия, Беларусь, Буркина-Фасо, Бурунди, Куба, Шимолий Корея, Эритрея, Эрон, Мали, Нигер, Никарагуа ва Судан бўлган.

Қозоғистон, Қирғизистон, Тожикистон ва Ўзбекистон 51 та бетараф давлат қаторидан жой олган. Туркманистон эса овоз беришда умуман иштирок этмаган. 

Резолюция матнида Украинанинг мустақиллиги, суверенитети ва ҳудудий яхлитлиги қўллаб-қувватланиши билдирилган. АҚШ лойиҳа матнидан айнан суверенитет ва ҳудудий яхлитлик, шунингдек БМТ Низомига оид икки бандни олиб ташлашни таклиф қилган эди. Бироқ давлатлар АҚШ таклифи бўйича овоз беришни рад этган ва резолюция дастлабки кўринишда қабул қилинган. 

Эслатиб ўтамиз, 24 февраль куни Украина Президенти Владимир Зеленский Россия томонидан бошланган кенг кўламли урушнинг тўрт йиллиги муносабати билан халққа видеомурожаат йўллаганди. Зеленский нутқи давомида урушнинг илк кунлари, халқнинг танлови, оғир йўқотишлар ва тинчлик масаласи ҳақида кўплаб баёнотлар берган. Президент дастлаб ушбу тарихий санани эслаган. Унинг таъкидлашича, ўша кунларда кўпчилик Украина тез таслим бўлади, деб ўйлаган. Аммо украиналиклар бошқача йўлни танлаган.