Британия музлатилган Россия активларининг бир қисмини Украинага ўтказишга тайёр

Буюк Британия ҳукумати Россиянинг музлатилган 8 миллиард фунт стерлинг (10,6 миллиард доллар) активларини Украинага ўтказишга тайёр. Бу ҳақдда “The Times” хабар берди.

Бу пул Украинанинг кейинги икки йилдаги молиявий эҳтиёжларининг учдан икки қисмидан кўпроғини қоплайди – ё можарони давом эттириш ёки тинчлик келишувига эришилса, қайта қуриш ишларини молиялаштириш учун.

3 декабрь куни Брюсселда бўлиб ўтган NATO Ташқи ишлар вазирларининг йиғилишида Украинани молиялаштириш учун Буюк Британиядаги Россиянинг музлатилган активларидан фойдаланиш режалари муҳокама қилинганди.

Октябрь ойида эълон қилинган Буюк Британия Молия вазирлигининг 2024–2025 йилларга мўлжалланган молиявий санкцияларни амалга ошириш бўйича бошқармаси (OFSI) маълумотларига кўра, Британия ҳукумати ҳарбий операция бошланганидан бери Россиянинг 28,7 миллиард фунт стерлинглик активларини музлатиб қўйган. Ўтган йил давомида умумий қиймат 10,2 миллиард фунт стерлингдан 22,5 миллиард фунт стерлинггача ўсди.

3 декабрь куни Еврокомиссия вакиллари Украинани молиялаштиришнинг иккита вариантини, жумладан, Россия активлари билан таъминланган “репарация кредити”ни тасдиқлади. Ушбу қарор Европа Иттифоқига аъзо барча давлатларнинг розилигини талаб қилмайди ва малакали кўпчилик томонидан маъқулланади. Вариантлардан бири декабрь ойида Европа Иттифоқи Кенгаши томонидан тасдиқланиши кутилмоқда.

Буюк Британия Европа Иттифоқига аъзо эмас, лекин Франция ва Германия билан биргаликда Европа тинчлик ташаббусини ишлаб чиқмоқда. Мамлакат, шунингдек, Украинадаги потенциал тинчликпарварлик миссиясида иштирок этишга тайёр бўлган 30 дан ортиқ давлатларнинг, биринчи навбатда, Европанинг иттифоқи – “кўнгиллилар коалицияси” таркибига киради ва мувофиқлаштирувчи роль ўйнайди. ЕИ сингари Лондон ҳам Россияга қарши чекловларни қўллаб-қувватлайди ва ўзининг санкциялар сиёсатини юритади.

“Politico” Еврокомиссия томонидан тасдиқланган ҳужжат тафсилотларини ошкор қилди. У Украинага музлатилган Россия активларидан фойдаланган ҳолда 165 миллиард евро миқдорида кредит беришни таклиф қилмоқда. Бу маблағ блокдаги хусусий банк ҳисобларида музлатилган 25 миллиард евро, шунингдек, Бельгиянинг “Euroclear” депозитарийсидан олинган 140 миллиард еврони ўз ичига олади.

Бельгия, “Euroclear” ва Европа Марказий банки режани “қонуний ва молиявий жиҳатдан хавфли” деб ҳисоблаб, унга қарши чиқмоқда.

Москва Россия активлари билан боғлиқ ҳар қандай ҳаракатлар учун қаттиқ жавоб чоралари ҳақида огоҳлантиради ва бундай ҳаракатларни “ўғирлик” деб билади. Президент Владимир Путин аввалроқ Россия қарши чоралар пакетини ишлаб чиқаётганини айтган эди.

Эслатиб ўтамиз, аввалроқ Венгрия Украинага ёрдам кўрсатиш учун еврооблигациялар чиқариш имкониятини расман инкор этди. Бу қадам Европа Иттифоқини Киевга 165 миллиард евро кредит ажратиш учун музлатилган Россия давлат активларини қандай йўл билан ишлатиш масаласи ҳал бўлмаса, амалга оширилиши мумкин бўлган эҳтимолий “Б режа”сиз қолдиради.