Бу маълумот тўғрилигига ишонамиз – Трамп Хоманаийнинг ўлимига амин

АҚШ Президенти Дональд Трамп АҚШ ва Исроилнинг Эронга берган зарбалари оқибатида Эрон Олий раҳнамоси Оятуллоҳ Али Хоманаий ҳалок бўлганига ишончи комил эканини маълум қилди. Бу ҳақда у NBC News телеканалига берган интервьюсида сўз очди.

“Биз бу маълумот тўғри эканлигига ишонамиз”, дейди Трамп.

Шунингдек, у Эронда қарор қабул қилиш учун масъул бўлган шахсларнинг катта қисми АҚШнинг оммавий зарбалари оқибатида ҳалок бўлганини айтган.

“NBC News билан телефон орқали мулоқотда Трамп бугунги зарбалар оқибатида Эрон раҳбариятининг “катта қисми” ўлдирилганини тасдиқлади”, деб ёзади телеканал.

Трамп, шунингдек, “бир неча кишини” назарда тутаётганини айтган, бироқ уларнинг аниқ сонини очиқламаган.

Бундан ташқари, у АҚШ зарбалари муваффақиятли бўлганини маълум қилган ва Ислом Республикасига етказилган зарардан сўнг уни қайта тиклаш учун йиллар керак бўлишини билдирган.

“Биз уларга жуда катта зарар етказдик. Уларга тикланиш учун йиллар керак бўлади”, дейди Трамп.

Эслатиб ўтамиз, аввалроқ “Reuters” исроиллик юқори лавозимли шахсга таяниб, Оятуллоҳ Али Хоманаий ўлдирилгани, унинг жасади топилиб, сурати Исроил Бош вазири Биньямин Нетаньяхуга кўрсатилгани ҳақида хабар берган эди. Бироқ ҳали бу хабар Эрон томонидан тасдиқланмади.