Дунёнинг энг бой одами ўзгарди

Дунёдаги энг бой одам ўзгарди – Tesla ва SpaceX асосчиси Илон Маскнинг ўрнини Oracle асосчиси Ларри Эллисон эгаллади. Бу ҳақда “Bloomberg” хабар берди.

Қайд этилишича, Эллисоннинг бойлиги 393 млрд долларга етган, Маскники эса 385 млрд доллар. Бир кунда Эллисоннинг мулки 101 млрд долларга ошган. Нашр томонидан эълон қилинган рейтинг ўз тарихи учун энг катта ўсиш саналади. Маск қарийб бир йил биринчи ўринда турган, аввалроқ эса у Amazon асосчиси Жефф Безос ва LVMH асосчиси Бернар Арно билан навбат алмашган. Ҳозир Безос тўртинчи, Арно эса саккизинчи ўринда.

“Forbes” нашри Эллисоннинг бойлиги ўсишини 35 фоиз деб баҳолаб, унинг мулкини 395 млрд доллар қилиб кўрсатган. Бироқ бу нашр рейтингида Маск ҳали ҳам биринчи ўринда турибди. 

81 ёшли Ларри Эллисон Oracle’ни 1977 йили Боб Майнер ва Эд Оутс билан бирга тузган. 37 йил компанияга раҳбарлик қилгач, 2014 йилда бош директорликдан кетган, ҳозирда эса директорлар кенгаши раиси ва техник директор. У Oracle акцияларининг 40 фоиздан ортиғини назорат қилади.

Шунингдек, Paramount Skydance компаниясининг тахминан 50 фоизи унга тегишли. Эллисон 2018–2022 йилларда Tesla директорлар кенгашида ҳам бўлган ва ҳали ҳам компания акцияларига эга.

Унинг бойлиги Oracle акциялари кескин кўтарилиши орқали ошди. Компаниянинг 2026 молиявий йили биринчи чораги ҳисоботига кўра, булутли технологиялардан тушум 28 фоизга ўсиб 7,2 млрд долларга, булутли инфратузилмадан тушум эса 55 фоизга кўтарилиб 3,3 млрд долларга етган. Oracle мажбуриятлар портфели 359 фоизга ўсиб, 455 млрд долларга етган. Бунга OpenAI билан 4,5 ГВт қувватли дата-марказлар яратиш бўйича шартнома ва АҚШ Президенти Дональд Трамп эълон қилган Stargate II инфратузилмаси лойиҳасида иштирок этиши сабаб бўлган.

Эллисон Республикачилар партиясини қўллаб-қувватлайди.

Эслатиб ўтамиз, аввалроқ Хитойдаги Pop Mart ўйинчоқлар дўконлари тармоғи эгаси, “Labubu” ўйинчоқлари ишлаб чиқарувчиси Ван Нинг “Bloomber Billionaires Index” рейтингида дунёнинг энг бой 85-одами бўлганди.