Энди айрим блогерлар Кореяга киритилмаслиги мумкин

Жанубий Корея ҳақида ҳақоратли ёки ёлғон маълумот эълон қилган чет эллик блогерларнинг мамлакатга кириши тақиқланиши мумкин. Бу ҳақда “The Korea Times” хабар берди.

Нашрнинг ёзишича, жорий ҳафтада бўлиб ўтган Вазирлар Маҳкамаси йиғилишида Адлия вазири Чун Сон Хо янги тақиқ жорий этилиши мумкинлигини маълум қилган.

“Биз Жанубий Кореяга нисбатан нафрат билдираётган хорижликларнинг киришини чеклаш бўйича комплекс чораларни кўриб чиқамиз”, деган у.

Нашрга кўра, илгари корейс маданиятини масхара қилувчи ёки умумий салбий хулосалар чиқарувчи видеолар шунчаки провокация ёки “кликбейт” деб ҳисобланган. Аммо таклиф этилаётган чекловлар кучга киргач, бу жиддий оқибатларга олиб келиши мумкин.

Ушбу ғоя бир неча шов-шувли ҳолатлардан сўнг пайдо бўлган. Хусусан, ўтган йили америкалик стример Жонни Сомали дўконлардан бирида жамоат тартибини қўпол равишда бузган видеони эълон қилгач, тергов остида қолган. Япониялик блогер Дэбо-чан эса Жанубий Кореяда гўёки ўнлаб шикастланган жасадлар топилгани ҳақида сохта видео эълон қилгани учун можарога сабаб бўлган.