Эрдўған Қора денгизда Украина қилган ҳужумни қоралади

Туркия Президенти Ражаб Тойиб Эрдўған мамлакат шимолий қирғоқлари яқинида Россиянинг “соя флоти”га мансуб танкерлар нишонга олинганидан сўнг, Қора денгиздаги тижорат кемаларига уюштирилган ҳужумларни “қабул қилиб бўлмас” деб атади. Президентнинг айтишича, бу воқеалар минтақадаги юк ташиш хавфсизлигига бўлган таҳдиднинг кучайиб бораётганини кўрсатмоқда. 

Маълум қилинишича, кеча, 1 декабрь куни Эрдўған журналистларга ушбу ҳужумларни ҳеч қандай шароитда оқлаб бўлмаслигини айтиб, барча тегишли томонларга зарур огоҳлантиришлар берилишини таъкидлади. Президентнинг сўзларига кўра, Россия ва Украина ўртасидаги уруш Қора денгиздаги кемалар хавфсизлигига бевосита таҳдид сола бошлаган.

“Жума куни бизнинг эксклюзив иқтисодий зонамизга яқин кемаларнинг нишонга олиниши вазиятнинг хавотирли даражада кучайганини кўрсатмоқда,” деди Эрдўған.

Аввалроқ Туркия Ташқи ишлар вазирлиги ҳам нефть танкерларига қилинган ҳужумлардан хавотир билдирган эди. Вазирлик вакили Онжу Кечели Анқара Қора денгизда “уруш кенгайишининг олдини олиш” ва минтақадаги “Туркия иқтисодий манфаатларига зарар етказмаслик” мақсадида манфаатдор томонлар билан мулоқотни давом эттираётганини маълум қилган. Баёнотда ҳужум учун жавобгарликни ўз зиммасига олган Украина бевосита қораланмаган.

Маълумот учун, Россиянинг “соя флоти” таркибига кирувчи “Kairos” ва “Virat” танкерларига 28 ноябрь куни кечқурун Туркия қирғоқлари яқинида ҳужум уюштирилган. Украина ОАВ маълумотларига кўра, улар Украина Хавфсизлик хизмати томонидан бошқариладиган Sea Baby денгиз дронлари томонидан урилган. Ҳужум танкерлар юксиз ҳолда, Новороссийск портига йўл олаётган вақтда юз берган.

Эслатиб ўтамиз, Қозоғистон 30 ноябрь куни Украинага Қора денгизда жойлашган ва жаҳон нефтининг 1 фоизидан ортиғини қайта ишлайдиган Каспий нефть қувури консорциуми (CPC) терминалига ҳужумларни тўхтатишни илтимос қилганди.