Эрдўғаннинг иттифоқчиси ШКТРни Туркияга қўшилишга чақирди

Туркия Миллий ҳаракат партияси раиси Давлат Баҳчели 19 октябрь куни бўлиб ўтган сайловдан икки кун ўтгач, кеча, 21 октябрь куни парламентдаги чиқишида Кипр турклари томонидан эълон қилинган давлат – Шимолий Кипр Турк Республикаси парламенти Туркияга қўшилиш масаласини овозга қўйиши лозимлигини билдирди.

Президент Ражаб Тойиб Эрдўғаннинг яқин иттифоқчиси бўлган Баҳчели узоқ йиллар давомида ҳукумат сиёсатига йўналиш бериб келган шахс сифатида танилган. У этник жиҳатдан бўлинган оролда федератив ечим ҳақидаги чақириқларни рад этди ва “Кипр – туркларники ва турклар ватани” деб таъкидлади.

Марказчи-сўл сиёсатчи Туфан Эрҳурманнинг кипрлик туркларнинг келгуси раҳбари сифатида сайланиши оролда саккиз йилдан буён тўхтаб қолган тинчлик музокараларини қайта тиклаш умидини уйғотди. У кипрлик юнонлар билан музокараларни қайта бошлашга ваъда берган.

Эрдўған 19 октябрь куни бўлиб ўтган сайловдан сўнг янги етакчини табриклади, аммо Баҳчелининг сўзлари миллийчи лагернинг Анқара билан сиёсий ва ҳудудий яқинлашув йўлидаги даъватини яна бир бор намоён қилди.

“Шимолий Кипр Турк Республикаси парламенти Туркия Республикасига қўшилиш ҳақида қарор қабул қилиши керак”, деди Баҳчели. 

Унинг таъкидлашича, турк кипрликлар тақдири “бундай даражадаги иштирок билан” белгилаб бўлмайди.

“Федерация ҳақидаги таклифлар амалга ошмайди ва уларнинг келажаги йўқ. Кипр – бизнинг миллий ишимиз ва биз бу ҳақ ишдан ҳеч қачон чекинмаймиз”, деди у.

Эрдўған ва Баҳчели турли сиёсий партияларга мансуб бўлсалар-да, 2018 йилдан бери ҳокимият иттифоқида фаолият юритиб келмоқда.

1974 йилда Грецияда юз берган ҳарбий тўнтариш ортидан Туркиянинг оролга ҳарбий аралашуви оқибатида Кипр можароси бошланди. Шундан бери Кипр ороли шимолий (турклар яшайдиган) ва жанубий (юнонлар яшайдиган) қисмларга бўлинган. 1983 йилда Шимолий Кипр Турк Республикаси (ШКТР) мустақиллигини эълон қилди, бироқ у фақат Туркия томонидан тан олинган. 2017 йилда тинчлик музокаралари якунсиз қолганидан буён юнон ва турк кипрликлар ўртасидаги муносабатлар кескин бўлиб қолмоқда.