Эркаклар ўртасидаги “Australian Open” финалчилари аниқ бўлди

Жорий йилнинг илк “Катта дубулға” турнири – Австралия очиқ чемпионатининг эркаклар ўртасидаги баҳслари финалчилари аниқ бўлди. Мусобақанинг ҳал қилувчи баҳсида дунёнинг тўртинчи рақамли ракеткаси, сербиялик Новак Жокович ва дунёнинг биринчи ракеткаси испаниялик Карлос Алькарасга қарши кортга чиқади.

2026 йилги Австралия очиқ чемпионатининг ярим финалида  Жоковичнинг рақиби дунёнинг иккинчи ракеткаси, италиялик Янник Синнер бўлди. Беш сет давом этган баҳсда сербиялик теннисчи 3/6, 6/3, 4/6, 6/4, 6/4 ҳисобида ғалаба қозонди.

Теннисчилар кортда 4 соат 9 дақиқа вақт ўтказишди. Ушбу учрашув давомида Жокович 12 та эйс амалга оширди, учта қўшалоқ хатога йўл қўйди ва саккизта брейк-пойнтдан учтасидан унумли фойдаланди.

Финалда Новак Жокович дунёнинг биринчи ракеткаси ҳисобланган, турнирнинг бошқа ярим финал учрашувида германиялик Александр Зверевни мағлуб этган испаниялик Карлос Алькарасга қарши кортга чиқади.

Агар Жокович финалда ғалаба қозонса, бу унинг фаолиятидаги 25-“Катта дубулға” турнири чемпионлиги бўлади. 38 ёшли сербиялик теннисчи Австралия очиқ чемпионати финалига 10 бор етиб келган ва уларнинг барчасида зафар қучган. Карлос Алькарас эса фаолиятида биринчи марта “Australian Open” финалида иштирок этади.

Таъкидлаш жоиз, Янник Синнер ушбу турнирда аввалги икки мавсумда чемпионликни қўлга киритган эди.

Маълумот учун, мусобақанинг финал учрашуви жорий йилнинг 1 февраль куни бўлиб ўтади. Турнирнинг умумий мукофот жамғармаси қарийб 75 миллион АҚШ долларини ташкил этади.