Синнер Жоковичнинг Мастерс рекордини янгилади

Дунёнинг биринчи ракеткаси Синнер бир календарь йилидаги дастлабки 5 та Мастерс турнирида кетма-кет 25 та учрашувда ғалаба қозонган тарихдаги илк теннисчига айланди. Бу борада Синнер Жоковичнинг рекордини янгилади.

Кеча, 11 май куни Янник Синнер Римда давом этаётган ATP Мастерс турнирининг тўртинчи босқичига йўл олди. Дунёнинг биринчи ракеткаси ҳисобланган италиялик теннисчи учинчи босқичда австралиялик Алексей Попиринни 6:2, 6:0 ҳисобида мағлуб этди.

24 ёшли Синнер энди 1/8 финалда ATP рейтингида 155-ўринни эгаллаб турган италиялик Андреа Пеллегринога қарши кортга чиқади.

Синнер бу мавсумда Индиан-Уэллс, Майами, Монте-Карло ва Мадриддаги Мастерс турнирларида чемпионликни қўлга киритганди.

Аввалги рекорд Новак Жоковичга тегишли бўлиб, сербиялик теннисчи 2011 ва 2015 йилларда кетма-кет 24 та Мастерс учрашувида ғалаба қозонган.

Шунингдек, Синнер Мастерс турнирларида кетма-кет 30 та ғалабага эришди. Бу борадаги рекорд ҳамон Жоковичга тегишли бўлиб, у 31 та кетма-кет ғалаба қайд этган.

Бундан ташқари, италиялик теннисчи кетма-кет 5 та Мастерс турнирида чемпион бўлган илк теннисчига айланди. У 2025 йилда Париж Мастерс мусобақасида ҳам бош совринни қўлга киритган эди.

Маълумот учун, Римдаги ATP Мастерс турнирининг умумий мукофот жамғармаси 8,235 миллион еврони ташкил этади. Мусобақа жорий йилнинг 17 май куни якунланади.