Эркинлик энди табиий ҳол эмас – Мерц

Жаҳон тартиби “бузилмоқда”, Европа ва АҚШ ўртасидаги алоқалар ортиқ ишончли эмас. Бу ҳақда бугун, 13 февраль куни Германия канцлери Фридрих Мерц Мюнхен Хавфсизлик конференцияси доирасидаги нутқида сўз очди.

Унинг айтишича, кўп йиллар давомида ўзгармай келган қоидаларга асосланган тартиб энди мавжуд эмас, давлатлар хавфсизлик ва ҳимоя стратегиясини қайта кўриб чиқиши керак. 

“Совет Иттифоқи қулаганидан кейин юзага келган “ягона қудрат” даври тугади ва янги кучлар сиёсати энг кучли давлатларни ҳам хавф остига қўймоқда. Бу жараён кўплаб демократик давлатларда кучли етакчиликка бўлган талаб билан боғлиқ”, деган расмий.

Канцлер, шунингдек, трансатлантик алоқалардаги беқарорликни ҳам танқид қилган. У АҚШ вице-президенти Жей Ди Вэнснинг Мюнхенда сўзлаган нутқига ишора қилиб, “Европа ва АҚШ орасида бўлиниш юзага келган”ини айтган, аммо Вэнс таърифидаги радикал қарашларни қабул қилмаслигини, минтақа қадриятларини ҳимоя қилишини, эркинлик, инсон қадр-қиммати ва халқаро ҳамкорликни устувор деб билишини урғулаган.

Мерц нутқида Россиянинг Украинадаги ҳаракатларига қарши ЕИ ва ГФРнинг ёрдамини давом эттириш муҳимлигини, Россия ишончли музокара учун ҳали тайёр эмаслигини, уруш фақат Кремль иқтисодий ва ҳарбий жиҳатдан чарчагач тугашини қайд этган.

Канцлернинг огоҳлантиришича, “катта қудратлар даврида эркинлик энди табиий ҳол эмас, у хавф остида”, шунинг учун Европа қатъият ва ирода билан бу эркинликни ҳимоя қилиши керак.

Эслатиб ўтамиз, аввалроқ 62‑Мюнхен хавфсизлик конференцияси (МХК) жорий йилнинг 13-15 февраль кунлари Hotel Bayerischer Hof ва Rosewood Munich меҳмонхоналарида бўлиб ўтиши маълум қилинганди. Дунёнинг турли минтақаларидан юзлаб етакчилар хавфсизлик сиёсати билан боғлиқ муаммоларни муҳокама қилади. Конференцияда ҳозирга қадар 50 та давлат ва ҳукумат раҳбарлари иштирок этишини тасдиқлаган. Бу айниқса, кўплаб Европа давлатлари раҳбарларини ва Германия федерал ҳукумати делегациясини, шунингдек, канцлер Фридрих Мерц бошчилигидаги кенг ваколатли гуруҳни ўз ичига олади.

Мусулмон Содиқ