Эйфель минорасининг бир қисми сотилди

Францияда Эйфель минорасига тегишли тарихий спираль зинанинг бир бўлаги аукционда қарийб 450 минг еврога сотилди. Бу ҳақда кеча, 22 май куни Arcurial аукцион уйи маълум қилди.

Сотилган қисм 19-аср охирига тегишли бўлиб, баландлиги тахминан 2,7 метр ва 14 поғонадан иборат. У Эйфель минорасининг иккинчи ва учинчи қаватларини боғлаб турган тарихий зинанинг бўлаги ҳисобланади.

Аукциондан олдин унинг нархи 120–150 минг евро атрофида баҳоланган эди, бироқ аноним француз коллекционери энг юқори таклифни бериб, ушбу ноёб артефактни қўлга киритди.

Мазкур зинадан 1889 йилги Бутунжаҳон кўргазмаси вақтида илк ташриф буюрувчилар фойдаланган. Ўша пайтда муҳандис Густав Эйфель томонидан қурилган Эйфель минораси айнан шу кўргазма учун барпо этилган эди.

Тахминан 1,4 тонна оғирликдаги бу конструкция 40 йилдан ортиқ вақт давомида шахсий коллекцияда сақланган ва кейинчалик реставрация қилинган.

1983 йилда модернизация ишлари вақтида бу спираль зинанинг асл қисми демонтаж қилинган, чунки у хавфли деб топилиб, ўрнига лифтлар ўрнатилган.

Шундан сўнг конструкция 24 бўлакка бўлинган. Унинг айрим қисмлари ҳозирда Нью-Йоркдаги Озодлик ҳайкали ёнида, Япониядаги музейлар ва хусусий коллекцияларда сақланмоқда.

Маълумот учун, Эйфел минораси 1889 йилги Бутунжаҳон кўргазмаси учун вақтинчалик иншоот сифатида қурилган бўлиб, дастлаб у демонтаж қилиниши режалаштирилган эди. Бироқ вақт ўтиши билан у Парижнинг энг машҳур рамзига айланган ва бугунги кунда дунёдаги энг кўп ташриф буюриладиган иншоотлардан бири ҳисобланади.

Эслатиб ўтамиз, аввалроқ Уйғониш даври рассоми ва ҳайкалтароши Микеланжело Буонарротининг картинаси “Christie’s” кимошди савдосида 27,2 миллион долларга сотилганди.