Гитлернинг ДНКсида руҳий касалликларга мойиллик аниқланди

Даниянинг Орхус университети олимлари Адольф Гитлер ДНКсида тўртта руҳий касалликка генетик мойилликни аниқлади. Унда диққат етишмовчилиги ва гиперфаоллик синдроми, аутизм, биполяр бузилиш ҳамда шизофрения ривожланиш хавфи юқори бўлган. Бу ҳақдаги тадқиқот “Daily Mail” нашрида эълон қилинди.

Мутахассислар Гитлернинг қон намуналарини таҳлил қилган. Ушбу қон изи 1945 йилда Гитлер ўз жонига қасд қилганидан сўнг, америкалик офицер Росвелл Розенгрен томонидан унинг бункеридаги диван қопламасидан олинган. Кейинчалик олимлар ушбу намунани генетик таҳлилдан ўтказиб, геномни кетма-кет ўқиш усули орқали тахминан уч миллиард дона генетик йўриқни ташкил этувчи қон таркибини батафсил ўрганган. 

Тадқиқотчилар хулосасига кўра, Гитлерда диққат етишмовчилиги ва гиперфаоллик синдроми ривожланиш эҳтимоли ўртача даражадан юқори бўлган. Шунингдек, у аутизм, биполяр бузилиш ва шизофрения хавфи юқори бўлган аҳолининг 1 фоизига кирган. Бу касалликлар генетик йўл билан, яъни наслдан-наслга ўтиши мумкин.

Қайд этиш жоиз, шизофрения инсоннинг ҳақиқатни тўғри идрок этиш, фикрлаш ва ҳиссий ҳолатини бузадиган руҳий касаллик бўлиб, одатда кайфиятнинг кескин ўзгариши, ҳаддан ташқари шубҳаланувчанлик, мантиқсиз ёки ғайриоддий фикрлар, галлюцинациялар (бўлмаган нарсани кўриш ёки эшитиш), бефарқлик, шунингдек фикрни аниқ ифодалаш ва қарор қабул қилишдаги қийинчиликлар кузатилади.

“Бундай касалликларнинг комбинацияси жуда мураккаб. Гитлер миллиондан бир, балки миллиарддан биринчи ҳолат. Мен уни жиноятга мойил аутистик психопатия (criminal autistic psychopathy) деб аташ мумкин деб ўйлайман,” дейди Тринити коллежи психиатрия профессори Майкл Фицджералд. 

Шу билан бирга, олимлар Гитлернинг учинчи даражали қариндоши Вейт Алоизий бир неча йил Венадаги руҳий шифохонада даволанганини ҳам эслатган. У галлюцинациялар ва бемаъни хатти-ҳаракатлар туфайли кўпинча тўшакка боғлаб қўйилган. Тадқиқотчилар бу ҳолат Гитлердаги руҳий бузилишларга ирсий омиллар сабаб бўлганини тасдиқлайди, дея ҳисоблаган. 

Эслатиб ўтамиз, аввалроқ  Адольф Гитлерга тегишли экани айтилган соат АҚШда 1,1 миллион долларга сотилганди. Соат Мэриленддаги Alexander Historical Auctions аукционида аноним харидор томонидан сотиб олинган.

Моҳичеҳра Қадамова