Гонконгдаги ёнғинда ҳалок бўлганлар сони 100 га яқинлашди
Олам
−
28 Ноябрь 3682 2 дақиқа
Гонконгдаги Wang Fuk Court тураржой мажмуасида содир бўлган йирик ёнғинда ҳалок бўлганлар сони қарийб 100 нафарга етди. Ҳозирга келиб 94 кишининг ўлими тасдиқланди. Бу ҳақда “Associated Press” хабар берди.
Нашрнинг ёзишича, ёнғин хавфсизлиги хизмати расмий равишда 94 киши вафот этганини тасдиқлаган.
Бу Гонконгда сўнгги 17 йилдаги энг кучли ва энг кўп қурбонлар билан якунланган ёнғин экани қайд этилган.
Бу орада “Bild” газетаси тураржой мажмуасидаги фожианинг сабаби бамбукдан ясалган қурилиш русумидаги искала (леса)га ташлаб юборилган сигарета бўлиши мумкинлигини ёзди.
Wang Fuk Court мажмуасида квартираси бор бўлган Кико Ма нашрга берган интервьюсида таъмирлаш ишлари сабабли унинг квартирадаги деразалари бир йилдан ошиқ вақт давомида пенополистирол билан ёпилганини айтган.
Расмийларга кўра, бу ҳам оловнинг тез тарқалишига сабаб бўлган. Киконинг айтишича, баъзида дераза ёнида сигарета қолдиқлари топилган, уларни қурувчилар ташлаган бўлиши мумкин.
Аммо улкан тураржой мажмуасидаги муаммолар рўйхати бу билан тугамайди. Баъзи ёнғин сигнализациялари таъмир вақтида ўчириб қўйилган эди, чунки қурувчилар бинога кириш-чиқиш учун ёнғин зинапояларидан мунтазам фойдаланиб турган.
Полиция таъмирлаш ишларини олиб борган қурилиш фирмасининг уч ходимини ҳибсга олган.
“Бизда компания масъул шахсларининг қўпол бепарволик билан иш тутгани, бу эса ҳодисага олиб келгани ва оловнинг тезда назоратдан чиқиб кетиб, кўплаб қурбонларга сабаб бўлганига асослар бор”, деган Гонконг полицияси вакили.
Эслатиб ўтамиз, Wang Fuk Court мажмуасидаги ёнғин 26 ноябрь куни кундузи бошланган. Реновация режаси доирасида уйлар атрофида қурилган бамбук искала ёниб кетган. Ўт тезда ёйилиб, мажмуанинг барча саккиз биносини қамраб олган.
Маҳаллий ҳукумат оловнинг шунчалик тез тарқалишини ғайриоддий деб топган ва сабабларни аниқлаш учун жиноий тергов ўтказилишини маълум қилган.
Эҳтиётсизлик оқибатида одам ўлимига сабаб бўлганлик гумони билан уч киши ҳибсга олинган.
