Иқтисод, миграция ва босим ортидан Трампнинг ҳал қилувчи нутқи янграйди

АҚШ етакчиси Дональд Трамп Конгресс олдидаги навбатдаги мурожаатини Президентлиги учун ҳал қилувчи паллада йўллайди. Сўнгги бир йилда у ижро ҳокимияти ваколатларини кенгайтириш, миграцияни кескин чеклаш, ташқи иттифоқларни қайта кўриб чиқиш ва президентлик институти ролини қайта белгилашга қаратилган шиддатли кун тартибини амалга оширган. Бироқ бу қадамлар жамиятда бирдек қабул қилинмаган ва кескин баҳсларга сабаб бўлган. Бу ҳақда “BBC” ёзди.

Ижтимоий сўровлар унинг иккинчи муддатида қўллаб-қувватлаш пасайганини кўрсатмоқда. Кузги оралиқ сайловлар арафасида бу мурожаат Трамп учун жамоатчилик ишончини мустаҳкамлашга қаратилган ягона йирик майдон ҳисобланади. Республикачилар Конгрессда устунликни сақлаб қолиш ёки назоратни демократларга бой бериш эҳтимолига дуч келмоқда.

Иқтисодиёт ва миграция масалалари анъанавий равишда Трампнинг кучли нуқталари эди, аммо охирги қарорлар, жумладан, юқори божлар ва федерал рейдлар жамоатчилик фикрида иккиланиш уйғотган. Олий суднинг айрим тарифларни ноқонуний деб топиши савдо сиёсати атрофида янги ноаниқликларни келтириб чиқарган. Инфляция пасайган бўлса-да, аҳоли кутган нарх тушиши ҳали сезиларли эмас.

Маъмуриятнинг миграция сиёсати ҳам қаршиликларга учрамоқда. Айрим шаҳарлардаги рейдлар оммавий норозиликларга сабаб бўлган, Конгрессда эса хавфсизлик идораларини молиялаштириш юзасидан тортишув давом этмоқда. Иқтисодий “арзончилик” кун тартиби, кредит фоизларини чеклаш ёки уй-жой таклифини ошириш каби ташаббуслар эса ҳозирча амалий натижа бермаган.

Шу шароитда Трамп мурожаат орқали ўз дастурини кенг жамоатчиликка қайта тақдим этиш имконига эга. Таҳлилчиларга кўра, у одатдаги каби ютуқларни урғулаб, танқидчиларга қарши кескин позицияни сақлаб қолиши мумкин. Аммо бу гал вазият бошқача.

Эслатиб ўтамиз, аввалроқ Трамп янги глобал импорт божларини 15 фоизгача оширмоқчи эканини айтган эди.