Инфантино мухлисларни ҳот-дог ва кола билан меҳмон қилмоқчи 

Халқаро футбол федерацияси (FIFA) президенти Жанни Инфантино 2026 йилги Жаҳон чемпионати финалига 2 миллион долларлик чипта сотиб олган мухлисларга ҳазил аралаш тарзда ҳот-дог ва бир шиша кола совға қилишини айтди. Бу ҳақда Инфантино Милкен институти глобал конференциясида сўз очди.

“Агар кимдир финал учун 2 миллион долларлик чипта сотиб олса, мен шахсан уларга ҳот-дог ва кoкa-кола олиб бораман, токи улар ажойиб вақт ўтказишсин”, дейди Инфантино.

FIFA президенти 2026 йилги Жаҳон чемпионати чипталари нархининг кескин ошишини юқори талаб ҳамда АҚШда чипталарни қайта сотишга рухсат берилгани билан изоҳлаган.

“Биз бозорни ҳисобга олишимиз керак. Бу дунёдаги энг ривожланган кўнгилочар бозорлардан бири. Шу сабабли бозор нархларини қўллашимиз табиий. Баъзи одамлар нархлар юқори эканини айтмоқда, аммо бу чипталар иккиламчи бозорда бундан ҳам қимматроққа сотилмоқда”, дейди Инфантино. 

Ўтган ҳафта FIFA’нинг расмий қайта сотиш платформасида 2026 йил 19 июль куни Нью-Жерсида бўлиб ўтадиган финал учрашуви учун тўртта чипта сотувга қўйилди. Уларнинг ҳар бири қарийб 2,3 миллион долларга баҳоланган.

Жорий йилнинг апрель ойи бошида FIFA турнирнинг 104 та ўйинидан 40 таси учун чипта нархларини оширди. Финалнинг энг қиммат – 1-тоифали чиптаси нархи йил бошидаги 8700 доллардан 11 минг долларгача кўтарилди. Шунингдек, Бразилия, Аргентина, Англия, Германия ва Мексика иштирокидаги ўйинлар учун ҳам чипталар қимматлашган.

Бу қарор танқидларга ҳам сабаб бўлди. Европа мухлислар уюшмаси FIFA’ни чипта нархларини сунъий оширишда айблади. Инфантино эса чипталардан тушган даромад жаҳон бўйлаб футболни ривожлантиришга сарфланишини таъкидлади.

Маълумот учун, 2026 йилги Жаҳон чемпионати тарихда илк бор 48 та миллий терма жамоа иштирокида ўтказилади. Турнир мезбонлари – АҚШ, Канада ва Мексика бўлади. Мусобақа 11 июндан 19 июлгача давом этади.