“Исроил айбдор”. Эрон бўйлаб дафн маросимлари ўтказилди (видео)

Эронликлар сўнгги бир неча кун давомида қуролли тартибсизликлар пайтида ҳалок бўлган хавфсизлик кучлари аъзолари учун оммавий дафн маросимларида қатнашди. Бу ҳақда Press TV хабар берди.  

Қайд этилишича, дафн маросимлари Шероз, Қум ва Ҳамадон шаҳарларида бўлиб ўтган. Эроннинг энг юқори хавфсизлик органи сўнгги кунлардаги тартибсизликларни АҚШ ва Исроил уюштираётганини маълум қилган. Мамлакат Олий миллий хавфсизлик кенгаши котиби Али Ларижани АҚШ Президентининг баёнотлари Эрон халқининг ҳаётини издан чиқаришга ҳаракат бўлаётганини тасдиқлашини айтган.

“Норозиликлар дастлаб иқтисодий муаммоларга қарши бошланган бўлса-да, кейинчалик Исроил томонидан Эронни беқарорлаштиришга йўналтирилган. Эрон халқи аллақачон Исроилга қарши 12 кунлик урушдаги каби бирдамлик намойиш этди ва бундан кейин ҳам барча вайронкор режалар шу бирдамлик билан муваффақиятсизликка учрайди”, дейди Ларижани. 

Эслатиб ўтамиз, 2025 йилнинг сўнгги кунларида Эрон пойтахти Теҳронда маҳаллий валюта – эрон риали қийматининг кескин пасайиши фонида норозилик намойишлари бошланган эди.  

Кейинроқ бу намойишлар кучайиб кетди. Оғир иқтисодий вазият ва юқори инфляция фонида бошланган намойишларнинг бешинчи кунида норозилик чоғида 6 киши ҳалок бўлгани ва 17 киши жароҳат олгани маълум бўлди.  

3 январь куни Оятуллоҳ Али Хоманаий биринчи марта мамлакатда давом этаётган оммавий норозилик намойишлари ҳақида очиқ гапирди. Давлат телевидениесида сўзлаган нутқида у воқеаларни “ички ва ташқи душманларнинг фитнаси” деб атаган ва “тартибсизликларни қўзғатувчилар”нинг ҳаракатларига қаттиқ қаршилик кўрсатишни талаб қилганди.  

Ушбу тартибсизликларинг тўққизинчи кунида камида 35 киши ҳалок бўлгани, 1200 дан ортиқ одам ҳибсга олингани маълум бўлди.  Ўша вақтга келиб 2025 йил 28 декабрь куни бошланган норозилик намойишлари мамлакатдаги 31 вилоятнинг 27 тасида, камида 88 шаҳарда кузатилди. Ҳуқуқ ҳимоячиларининг ёзишича, баъзан Эрон хавфсизлик кучлари намойишчиларга қарши куч ишлатган. 

6 январдан бугун, 7 январга ўтар кечаси эса Эроннинг Ироқ билан чегарага яқин жойлашган Обиданон шаҳри (Илом вилояти) намойишчилар томонидан тўлиқ назоратга олингани ҳақида хабарлар пайдо бўлди. Бироқ кейинроқ, Эроннинг “Tasnim” ва “Mehr” ахборот агентликлари Ғарб ОАВларида тарқалган Маликшоҳи округи ва Обиданон шаҳри намойишчилар томонидан эгаллаб олингани ҳақидаги хабарларни рад этди.   

Тартибсизликларнинг 12-кунида эса мамлакатда интернет сегментидаги трафик бутунлай ўчирилди. Cloudflare IT-компанияси маълумотига кўра, 8 январь куни Эрондаги интернет-трафик қарийб 90 фоизга камайган. Тахминларга кўра, интернетдан эркин фойдаланиш фақат мансабдорлар ва куч тузилмалари вакилларида сақланиб қолган.